“PAŞA Bank” ASC 2027–2029-cu illəri əhatə edən yeni strateji inkişaf mərhələsinə hazırlaşır. Bank qarşıdakı üç ildə biznesin dayanıqlı böyüməsinə, kiçik və orta sahibkarlıq (KOS) və B2B ekosisteminin genişləndirilməsinə, süni intellekt texnologiyalarından istifadəyə və məhsuldarlığın artırılmasına xüsusi diqqət ayıracaq.

Marja.az xəbər verir ki, bu barədə “PAŞA Bank” ASC-nin İdarə Heyətinin sədri Cavid Quliyev LinkedIn hesabında məlumat verib.

Onun sözlərinə görə, ötən həftə bankın 200-dən çox rəhbər əməkdaşının iştirakı ilə keçirilən görüşdə 2024–2026-cı illərin nəticələri qiymətləndirilib və növbəti üç il üçün strateji istiqamətlər müzakirə olunub.

Cavid Quliyev bildirib ki, geridə qalan dövr bank üçün mühüm nailiyyətlər və dəyərli təcrübə ilə yadda qalıb. Əldə olunan nəticələr növbəti inkişaf mərhələsi üçün əsas yaradıb.

Bankın rəhbəri 2027–2029-cu illər üzrə əsas prioritetlərin biznesin dayanıqlı böyüməsi, KOS və B2B ekosisteminin genişləndirilməsi, risklərin idarə edilməsi, texnologiya və süni intellekt (AI) imkanlarından səmərəli istifadə, eləcə də məhsuldarlığın artırılması olacağını vurğulayıb.

Yeni strategiyanın mərkəzində isə müştəriyönümlülük dayanacaq.

Strateji görüş çərçivəsində bankın İdarə Heyətinin üzvləri Bəhruz Nağıyev, Murad Süleymanov və Pərvin Əhədzadə ilə panel müzakirəsi keçirilib. Müzakirələrdə qarşıdakı dövrün prioritetləri müxtəlif perspektivlərdən qiymətləndirilib.

Görüşdə “PAŞA Bank”ın Müşahidə Şurasının sədri və “PAŞA Financial Holding”in Baş İcraçı Direktorunun müavini Şahin Məmmədov da iştirak edib.

Cavid Quliyev bildirib ki, yeni strategiyanın uğurla həyata keçirilməsində komanda əməkdaşlığı və ortaq baxış mühüm rol oynayacaq.

“İnanıram ki, strategiyanın gücü onu həyata keçirən insanlardan başlayır. Ortaq baxış və əməkdaşlıq uğurumuzun əsası olacaq”, – deyə bankın rəhbəri qeyd edib.

Yeni strateji istiqamətlərə dair açıqlamada konkret maliyyə hədəfləri, investisiya büdcəsi və ya rəqəmsal transformasiya layihələrinin detalları göstərilməyib.