Türkiyədə 1 milyard dollarlıq avtomobil zavodu layihəsini dayandıran Çinin elektrikli avtomobil istehsalçısı BYD Avropada genişmiqyaslı işə qəbul proqramına başlamağı və 2030-cu ilədək regiondakı əməkdaşlarının sayını 40 mindən çox artırmağı deyil, ümumilikdə 40 mindən çox işçiyə çatdırmağı planlaşdırır.

Marja.az xəbər verir ki, şirkət Avropa bazarında sadəcə avtomobil ixracatçısı olmaqdan çıxaraq regionun əsas avtomobil istehsalçılarından birinə çevrilməyi hədəfləyir. 

BYD-nin xarici əməliyyatlarına rəhbərlik edən icraçı vitse-prezidenti Stella Li oktyabrın 12-də Paris Avtomobil Sərgisində Bloomberg-ə müsahibəsində şirkətin Avropaya uzunmüddətli investisiya strategiyası həyata keçirdiyini bildirib.

Onun sözlərinə görə, BYD-nin Avropadakı əməkdaşlarının sayı yaxın müddətdə 10 min nəfəri keçəcək, 2030-cu ildə isə 40 min nəfərdən çox olacaq.

Bu planın reallaşması BYD-ni Avropada ən çox işçi çalışdıran qeyri-Avropa avtomobil istehsalçılarından birinə çevirə bilər.

Şirkət yeni əməkdaşları həm avtomobil sənayesindən, həm də digər sahələrdən cəlb etməyi nəzərdə tutur. Avropanın avtomobil şirkətlərində ixtisar olunan işçilərin də işə qəbul edilməsi imkanları qiymətləndirilir.

Macarıstandakı zavod istehsala başlayır, Fransa və İspaniya da gündəmdədir

Stella Li bildirib ki, BYD-nin Macarıstanda yerləşən ilk Avropa minik avtomobili zavodunun fəaliyyətə başlaması üçün hazırlıqlar son mərhələdədir.

Şirkət 2026-cı ilin dördüncü rübündə müəssisədə kütləvi istehsala başlamağı hədəfləyir.

BYD Avropada növbəti istehsal müəssisələrinin yaradılmasını da nəzərdən keçirir. Yeni zavodlar üçün potensial ölkələr arasında Fransa və İspaniya da var. 

Türkiyədə 1 milyard dollarlıq layihə dayandırılıb

Qeyd edək ki, BYD Türkiyə hökuməti ilə Manisa şəhərində təxminən 1 milyard dollar dəyərində avtomobil istehsalı müəssisəsinin yaradılmasına dair müqavilə imzalasa da, 2026-cı ilin iyununda layihənin icrasını qeyri-müəyyən müddətə dayandırıb.

Şirkət Türkiyədə istehsala başlanılması üçün konkret vaxt müəyyən etməyib və əsas diqqətini Avropa bazarında istehsalın lokallaşdırılmasına yönəldib. 

Avropa İttifaqının yeni məhdudiyyətləri qiymətləndirilir

Bu arada Çin və Avropa İttifaqı arasında aparılan danışıqlar nəticəsində Çindən idxal olunan hibrid avtomobillərin sayına məhdudiyyətlərin tətbiqini nəzərdə tutan razılaşma əldə edilib.

Stella Li bildirib ki, BYD yeni məhdudiyyətlərin şirkətin fəaliyyətinə mümkün təsirlərini qiymətləndirir. Lakin qərarların bütün detalları hələ məlum olmadığından yekun nəticə çıxarmaq tezdir. 

Hər gün yeni vakansiyalar - AzVak.az-da