Dövlət Statistika Komitəsi "2026-cı ilin yanvar-sentyabr aylarında Ümumi Daxili Məhsul istehsalı" başlıqlı məlumat yayıb.

Qeyd edilib ki, 2026-cı ilin yanvar-sentyabr aylarında ölkədə 102 milyard 48,2 milyon manat məbləğində və ya əvvəlki ilin eyni dövrü ilə müqayisədə 1,5 faiz çox ümumi daxili məhsul (ÜDM) istehsal edilib. İqtisadiyyatın neft-qaz sektorunda əlavə dəyər 1,2 faiz azalıb, qeyri-neft-qaz sektorunda isə 2,6 faiz artıb.

ÜDM istehsalının 34,3 faizi sənaye, 10,7 faizi ticarət; nəqliyyat vasitələrinin təmiri, 7,4 faizi nəqliyyat və anbar təsərrüfatı, 6,6 faizi kənd təsərrüfatı, meşə təsərrüfatı və balıqçılıq, 5,4 faizi tikinti, 2,9 faizi turistlərin yerləşdirilməsi və ictimai iaşə, 2,0 faizi informasiya və rabitə sahələrinin, 20,9 faizi digər sahələrin payına düşüb, məhsula və idxala xalis vergilər ÜDM-in 9,8 faizini təşkil edib.

Bu dövrdə informasiya və rabitə sahələrində əlavə dəyər real ifadədə 11,1 faiz, nəqliyyat və anbar təsərrüfatı sahələrində 10,0 faiz, turistlərin yerləşdirilməsi və ictimai iaşə sahələrində 4,5 faiz, ticarət; nəqliyyat vasitələrinin təmiri sahələrində 3,8 faiz, digər xidmət sahələrində 1,3 faiz, kənd təsərrüfatı, meşə təsərrüfatı və balıqçılıq sahələrində 1,1 faiz, sənayedə 0,2 faiz artıb, tikintidə isə 8,7 faiz azalıb.

Hər gün yeni vakansiyalar - AzVak.az-da

Sənaye istehsalı haqqında

Sənaye sektorunda 2026-cı ilin yanvar-sentyabr aylarında 51,2 milyard manat məbləğində və ya ötən ilin eyni dövrü ilə müqayisədə real ifadədə 0,8 faiz az sənaye məhsulu istehsal edilib.

Emal sənayesində 2026-cı ilin yanvar-sentyabr aylarında 16.982,9 milyon manat məbləğində və ya ötən ilin müvafiq dövrü ilə müqayisədə real ifadədə 3,4 faiz çox məhsul istehsal olunub və sənaye xarakterli xidmətlər göstərilib.

Emal sənayesində 2026-cı ilin yanvar-sentyabr aylarında daha çox artım avtomobil, qoşqu və yarımqoşquların istehsalı (+76,8%), əczaçılıq məhsullarının istehsalı (+60,4%), toxuculuq sənayesi (+47,6%), tütün məmulatlarının istehsalı (+16,0%), kağız və karton istehsalı (+14,5%), rezin və plastik kütlə məmulatlarının istehsalı (+8,5%), elektrik avadanlıqlarının istehsalı (+8,0%), tikinti materiallarının istehsalı (+7,1%), qida məhsullarının istehsalı (+6,4%), metallurgiya sənayesi (+6,1%) sahələrində olub.

2026-cı ilin yanvar-sentyabr aylarında kənd təsərrüfatı məhsulu istehsalı 1,1 faiz artıb

2026-cı ilin yanvar-sentyabr aylarında ölkədə faktiki qiymətlərlə 11 905,3 milyon manatlıq kənd təsərrüfatı məhsulu istehsal edilib. İstehsalın fiziki həcmi əvvəlki ilin eyni dövrü ilə müqayisədə 1,1 faiz artıb. Heyvandarlıq məhsullarının istehsalı 1,9 faiz, bitkiçilik məhsullarının istehsalı isə 0,5 faiz çoxalıb. Məhsulun 51,0 faizi bitkiçiliyin, 49,0 faizi heyvandarlığın payına düşür.

Real artım. Yanvar-avqust dövründəki 2,6 faizlik göstərici sentyabr ayının sonuna 1,1 faizə enib. Bitkiçilik sahəsində artım tempi 3,1 faizdən 0,5 faizə, heyvandarlıq sahəsində isə 2,0 faizdən 1,9 faizə düşüb. Əsas natural göstəricilər aşağıdakı qrafikdə və cədvəldə ayrıca verilir.

Hər gün yeni vakansiyalar - AzVak.az-da