Göyçaydan MDB ölkələrinə göndərilir

Göyçaydan MDB ölkələrinə göndərilir

Göyçay rayonunda nar bağlarında məhsul yığımına başlanılıb.

Kəndlilər yetişdirdikləri narın bir hissəsini yerli bazara çıxarır, bir hissəsini meyvə şirəsi istehsalı müəssisələrinə satır, bir hissəsini də öz həyətlərində Bakıya, həmçinin Rusiya və digər MDB ölkələrinin bazarlarına aparan iş adamlarına satırlar. Məhsul yığımı dekabr ayınadək davam edəcək.

Mütəxəssislərin fikrincə, bu il bağlara göstərilən yüksək aqrotexniki qulluq, havanın əlverişli keçməsi bol məhsulun əldə edilməsinə səbəb olub.

Nar bağlarında ötən ildəkindən daha çox məhsul var. Kəndlilər hər nar ağacında 30-50 kiloqram meyvə olduğunu deyirlər. Ən önəmlisi isə qabaqlayıcı tədbirlər görüldüyü üçün ağaclarda zədəli nar azlıq təşkil edir.

Rayon Kənd Təsərrüfatı İdarəsindən verilən məlumata görə, ötən il Göyçayda fermerlər və fərdi təsərrüfat sahibləri 3980 hektar nar bağından 48 min 500 ton məhsul tədarük ediblər. İş adamları narın 50 faizini Rusiya, Ukrayna və Gürcüstan bazarlarına çıxarıblar. İlkin hesablamalara görə, cari ildə nar istehsalı ötən ildəkindən çox olacaq.

Qeyd edək ki, son iki ildə rayonda 200 hektar sahədə yeni nar bağı salınıb. Noyabr və dekabr aylarında rayonda yeni bağların salınması üçün sahələrdə hazırlıq işlərinə başlanılıb. Rayonun 40-a yaxın kəndində yerli əhalinin əsas gəlir mənbəyi olan nar bağlarında əsasən ixrac qabiliyyətinə malik “Gülövşə”, “Vələs”, “Şəndi”, “Şirin”, “Bala Mürsəl” nar sortlarını yetişdirməyə üstünlük verirlər.

Ötən əsrin 90-cı illərinin əvvəllərində Göyçayda cəmi 251 hektar məhsuldar nar bağı mövcud idisə, hazırda rayonda 4350 hektar sahədə nar bağı var ki, bunun da 3980 hektarı bar verəndir.

06.10.2017 05:59