OPEC+ bazar iştirakçılarının gözləntilərinə uyğun olaraq noyabr ayı üçün neft hasilatı hədəflərini dəyişməz saxlamaq barədə razılığa gəlib. Qrupun hasilat siyasətində növbəti ciddi dəyişikliklərin 2027-ci ildən əvvəl baş verməyəcəyi gözlənilir.

Marja.az xəbər verir ki, Neft İxrac Edən Ölkələr Təşkilatı (OPEC) və Rusiya daxil olmaqla müttəfiqlərindən ibarət OPEC+ qrupunun yeddi əsas üzvü bazar günü keçirilən qısa onlayn görüşdə noyabr ayı üzrə hasilat limitlərinin qüvvədə saxlanılmasına qərar verib.

Söhbət Səudiyyə Ərəbistanı, Rusiya, İraq, Küveyt, Əlcəzair, Qazaxıstan və Omandan gedir.

ABŞ-İsrail və İran arasında davam edən müharibənin ixraca yaratdığı fasilələr fonunda Fars körfəzindəki OPEC+ ölkələri müəyyən edilmiş hasilat hədəflərindən xeyli aşağı səviyyədə neft hasil edir. Son aylarda regiondan neft ixracı normal səviyyənin təxminən 60-80%-i arasında dəyişib.

UBS analitiki Giovanni Staunovo bildirib ki, OPEC+ ölkələrinin yeddiliyi bazarın gözləntilərinə uyğun olaraq hasilat limitlərini dəyişməyib.

Onun sözlərinə görə, Hörmüz boğazından neft axınının artmasına baxmayaraq, faktiki hasilat həcmləri kvotalardan xeyli aşağı olaraq qalır.

“Buna görə də neft bazarında təklif qıtlığı davam edir”, – analitik qeyd edib.

G7 ehtiyatları bazara çıxarır

Neft qiymətləri cümə günü Avropa liderlərinin ABŞ Prezidenti Donald Trampın dizel ehtiyatlarının bazara buraxılması ilə bağlı çağırışını qəbul etməsindən sonra ucuzlaşıb.

“Böyük Yeddilik” ölkələrinin yanacaq qiymətlərindəki kəskin artımı yumşaltmaq məqsədilə dizel və xam neft ehtiyatlarının bir hissəsini bazara çıxaracağını açıqlamasından sonra neft fyuçersləri günü enişlə başa vurub. Beynəlxalq etalon sayılan Brent markalı neftin fyuçersləri 6 sent ucuzlaşaraq bir barel üçün 101,47 dollara düşüb.

ABŞ-ın West Texas Intermediate (WTI) markalı nefti isə 1,76 dollar ucuzlaşaraq 91,11 dollar/barelə enib.

G7 liderlərinin birgə bəyanatına əsasən, qarşıdakı dörd ay ərzində ehtiyatlardan ümumilikdə 100 milyon barel neft və neft məhsulu bazara çıxarılacaq. İlk 20 gün ərzində xüsusilə böyük həcmdə dizel ehtiyatlarının istifadəyə verilməsi nəzərdə tutulur.

G7-yə Fransa, Kanada, Almaniya, İtaliya, Yaponiya, Böyük Britaniya və ABŞ daxildir.

Bununla belə, ehtiyatların bazara çıxarılması qərarına baxmayaraq, Brent neftinin qiyməti hələ də 100 dollar/bareldən yüksəkdir. Müqayisə üçün, fevralın sonunda İranla müharibə başlamazdan əvvəl Brent təxminən 73 dollar səviyyəsində ticarət olunurdu.

OPEC+ hasilatı artırıb, amma artım əsasən kağız üzərində qalıb

İran müharibəsi OPEC+ ölkələrinin hasilat güclərinin qiymətləndirilməsi prosesini də gecikdirib.

Bu qiymətləndirmə üzv ölkələrin 2027-ci il üçün hasilat kvotalarının müəyyən edilməsi baxımından mühüm əhəmiyyət daşıyır. Münaqişə gələcək hasilat potensialı ilə bağlı hesablamaları daha qeyri-müəyyən edib.

OPEC+ 2026-cı ilin böyük hissəsində uzun illər davam edən hasilat məhdudiyyətlərini mərhələli şəkildə geri götürərək hasilat hədəflərini artırıb.

Lakin Yaxın Şərqdə davam edən münaqişə səbəbindən bu artımların böyük hissəsi faktiki hasilata çevrilməyib.

OPEC-in məlumatına görə, yeddi əsas OPEC+ ölkəsi avqust ayında gündəlik 25 milyon barel neft hasil edib.

Bu, iyul ayı ilə müqayisədə gündəlik 630 min barel çoxdur.

Bununla belə, hasilat fevralda – müharibədən əvvəlki dövrlə müqayisədə hələ də gündəlik təxminən 5 milyon barel aşağıdır.

OPEC+ ölkələrinin növbəti görüşü noyabrın 1-də keçiriləcək.

Hazırda OPEC+ ölkələrinin əksəriyyətini əhatə edən təxminən 2 milyon barel/gün həcmində hasilat məhdudiyyəti qüvvədə qalır.

Qrup növbəti hasilat artımlarının ölkələr arasında necə bölüşdürüləcəyini müəyyən etmək üçün istehsal güclərinin qiymətləndirilməsinin nəticələrini gözləyir.

Mənbələrin bildirdiyinə görə, hasilat siyasətində əhəmiyyətli dəyişikliklərin 2027-ci ildən əvvəl baş verməsi gözlənilmir.

Bazar günü OPEC+ daxilində ayrıca fəaliyyət göstərən Birgə Nazirlər Monitorinq Komitəsi də bazardakı vəziyyəti qiymətləndirmək üçün toplantı keçirib. Komitə hasilat siyasətini müəyyən etmir, əsasən üzv ölkələrin razılaşdırılmış öhdəliklərə əməl etməsini və bazardakı vəziyyəti izləyir.