“İnvest-AZ İnvestisiya Şirkəti” QSC 2026-cı ilin ilk 6 ayını  (yanvar - iyun)1 milyon 876 min manat xalis mənfəətlə başa vurub. Ötən ilin eyni dövründə şirkətin xalis mənfəəti 295,6 min manat təşkil etmişdi.

Marja.az şirkətin 30 iyun 2026-cı il tarixinə aralıq qısaldılmış maliyyə hesabatlarına istinadən xəbər verir ki, “Invest-AZ”ın xalis mənfəəti illik müqayisədə 6,35 dəfə və ya 534,8% artıb.

2026-cı ilin yanvar-iyun aylarında şirkətin cəmi gəlirləri 8 milyon 593 min manat təşkil edib. Bu göstərici 2025-ci ilin eyni dövründə 6 milyon 276 min manat olub. Beləliklə, şirkətin gəlirləri 36,9% artıb.

Gəlirlərin əsas hissəsini marja ticarətindən əldə olunan xalis gəlir formalaşdırıb. Bu istiqamətdən gəlir 5 milyon 534 min manatdan 7 milyon 890 min manata yüksəlib – artım 42,6% təşkil edib.

Eyni zamanda, broker xidmətlərindən və digər komissiyalardan gəlirlər 680,4 min manatdan 560 min manata düşərək 17,7% azalıb. Dividend gəlirləri isə 18,3 min manatdan 31,5 min manata yüksəlib.

Əməliyyat mənfəəti 5,7 dəfə artıb

Hesabat dövründə “Invest-AZ”ın əməliyyat üzrə mənfəəti 2 milyon 312 min manat olub. Bir il əvvəl bu göstərici cəmi 404,1 min manat idi. Beləliklə, əməliyyat mənfəəti təxminən 5,7 dəfə artıb.

Şirkətin vergidən əvvəl mənfəəti də 369,5 min manatdan 2 milyon 377 min manata yüksəlib. Mənfəət vergisi xərcləri 501,1 min manat təşkil etdikdən sonra şirkət yarımili 1 milyon 876 min manat xalis mənfəətlə tamamlayıb.

Aktivlər 45 milyon manatı ötür

30 iyun 2026-cı il tarixinə “Invest-AZ”ın cəmi aktivləri 45 milyon 81 min manat təşkil edib. 2025-ci ilin sonunda aktivlər 46 milyon 125 min manat idi. Başqa sözlə, ilin ilk yarısında aktivlərin həcmi 2,3% azalıb.

Şirkətin pul vəsaitləri və onların ekvivalentləri 30 milyon 619 min manatdan 29 milyon 392 min manata düşüb.

Hesabat dövrünün sonunda şirkətin cəmi öhdəlikləri 36 milyon 205 min manat, kapitalı isə 8 milyon 877 min manat olub. Kapital 2025-ci ilin sonu ilə müqayisədə təxminən 2,9% artıb.

Müştərilər üzrə kreditor borcları 20 milyon 194 min manatdan 15 milyon 546 min manata düşüb. Bunun əksinə olaraq, buraxılmış borc qiymətli kağızları üzrə uzunmüddətli öhdəliklər 5 milyon 622 min manatdan 8 milyon 203 min manata yüksəlib.

1,6 milyon manatdan çox dividend ödənilib

Kapitalda dəyişikliklər haqqında hesabata əsasən, şirkət 2026-cı ilin ilk yarısında 1 milyon 622 min 934 manat dividend ödəyib.

Şirkət eyni dövrdə 1 milyon 876 min manat mənfəət əldə etdiyindən bölüşdürülməmiş mənfəət 2025-ci ilin sonundakı 5 milyon 623 min manatdan 5 milyon 876 min manata yüksəlib.

Pul vəsaitlərinin hərəkəti haqqında hesabata görə, 2026-cı ilin ilk yarısında pul vəsaitləri və onların ekvivalentlərində 1 milyon 203 min manat azalma qeydə alınıb. Dövrün əvvəlində 30 milyon 619 min manat olan göstərici iyunun sonunda 29 milyon 392 min manata düşüb.

Hesabatda ən diqqətçəkən məqam mənfəətin gəlirlərdən xeyli sürətli artmasıdır. Gəlirlər 36,9% artdığı halda, xalis mənfəət 534,8% yüksəlib. Bunun əsas səbəblərindən biri marja ticarətindən xalis gəlirin 2,36 milyon manat artması və inzibati və digər əməliyyat xərclərinin gəlirlərlə müqayisədə daha aşağı templə yüksəlməsidir.

Digər diqqətçəkən məqam odur ki, şirkət 1,88 milyon manat xalis mənfəət əldə etməsinə baxmayaraq, bunun 1,62 milyon manatını dividend şəklində bölüşdürüb. Nəticədə yüksək mənfəət artımı kapitalda eyni miqyasda artıma çevrilməyib.

Hər gün yeni vakansiyalar - AzVak.az-da