İranın xarici işlər naziri Abbas Əraqçi ABŞ Prezidenti Donald Trampın Tehrana qarşı misli görünməmiş miqyasda iqtisadi müharibə elan etməsinə reaksiya verib.

Əraqçi bu barədə “X” hesabında yazıb.

O, ABŞ-ın dövlət borcunun 40 trilyon dollara çatmasına işarə edərək, Trampın elan etdiyi iqtisadi müharibənin diqqəti Vaşinqtonun düşdüyü maliyyə böhranından yayındırmaq cəhdi olduğunu bildirib.

“Dırnaq arası İqtisadi D-Günü əməliyyatı ABŞ-ın öz böhranından - misli görünməmiş borcdan və yüksələn faiz xərclərindən diqqəti yayındırmaq cəhdidir. Nəticə verməmiş siyasəti yenidən həyata keçirmək daha çox məğlubiyyətə və İran xalqının nifrətinə səbəb olacaq. ABŞ-ın iqtisadi terrorizmi qlobal iqtisadiyyatı və suverenliyi təhdid edir”, - Əraqçi vurğulayıb.

Qeyd edək ki, ABŞ Prezidenti İrana qarşı “indiyə qədər ən güclü” iqtisadi müharibə elan edib.

Tramp İrana qarşı misli görünməmiş "iqtisadi müharibə" elan edib

ABŞ Prezidenti Donald Tramp İrana qarşı “indiyə qədər heç bir ölkə əleyhinə tətbiq olunmayan, misli görülməmiş” miqyasda iqtisadi müharibə və təcridetmə elan edib.

O, bu barədə “Truth Social” hesabında bildirib.

Tramp İrana razılaşma əldə etmək üçün böyük fürsətlər verdiyini, lakin İranın həmin fürsətlərdən istifadə etmədiyini deyib.

ABŞ Prezidenti İrana qarşı indiyə qədər ən məhvedici iqtisadi əməliyyat başlatdığını bəyan edib.

“Onların donanması yoxdur, Hərbi Hava Qüvvələri məhv edilib, hərbi zavodları xarabalığa çevrilib, milli valyutaları isə ipdən asılmış vəziyyətdədir”, - Tramp iddia edib.

O, həmçinin, İrana nəfəslik vermək üçün öz maliyyə qurumlarından, hava limanları və biznes şəbəkələrindən, eləcə də hökumət qurumlarından istifadə edən istənilən ölkənin “inanılmaz iqtisadi nəticələrlə” üzləşəcəyi ilə bağlı xəbərdarlıq edib.

Tramp bu əməliyyatı “İqtisadi D-Günü” adlandırıb.

“Bu tarixi tədbirlər onları və onların dünyada terror yaymaq potensialını şikəst edəcək. İran heç vaxt nüvə silahına sahib olmayacaq”, - Tramp qeyd edib.