Marja.az Bakı Fond Birjasının statistikasına istinadən xəbər verir ki, bu, 2025-ci ilin eyni dövrü ilə müqayisədə 6 milyard 897 milyon 994 min 254 manat və ya 13,2 faiz azdır. Ötən ilin yanvar-iyun aylarında birja üzvlərinin ümumi dövriyyəsi 52 milyard 443 milyon 26 min 736 manat olmuşdu.

Dövriyyənin azalmasına baxmayaraq, əməliyyatların sayında kəskin artım qeydə alınıb. Belə ki, 2026-cı ilin ilk yarısında birja üzvləri üzrə ümumi əməliyyat sayı 70 min 667 olub. Bu göstərici 2025-ci ilin eyni dövründə 30 min 147 idi. Beləliklə, əməliyyatların sayı 40 min 520 ədəd və ya 134,4 faiz artıb.

Hesabat dövründə dövriyyə həcminə görə lider “ABB Invest İnvestisiya Şirkəti” QSC olub. Şirkətin dövriyyəsi 22 milyard 475 milyon 959 min manat təşkil edib. Bu, 2025-ci ilin yanvar-iyun ayları ilə müqayisədə 4 milyard 701 milyon 650 min manat və ya 26,5 faiz çoxdur. “ABB Invest”in ümumi dövriyyədə payı 33,9 faizdən 49,3 faizə yüksəlib.

2025-ci ilin lideri olan “PAŞA Kapital İnvestisiya Şirkəti” QSC isə 2026-cı ilin ilk yarısında ikinci yerə geriləyib. Şirkətin dövriyyəsi 24 milyard 459 milyon 931 min manatdan 7 milyard 619 milyon 302 min manata düşüb. Bu, 16 milyard 840 milyon 629 min manat və ya 68,8 faiz azalma deməkdir.

İlk üçlüyə 4 milyard 493 milyon 50 min manat dövriyyə ilə “Unicapital İnvestisiya Şirkəti” ASC daxil olub. Şirkətin dövriyyəsi ötən ilin eyni dövrü ilə müqayisədə 3 milyard 306 milyon 83 min manat və ya 278,5 faiz artıb.

Dövriyyə artımı baxımından “CPM-İnvest İnvestisiya Şirkəti” QSC və “İnvest-Az İnvestisiya Şirkəti” QSC də seçilib. “CPM-İnvest”in dövriyyəsi 1 milyard 916 milyon 375 min manatdan 4 milyard 331 milyon 12 min manata, “İnvest-Az”ın dövriyyəsi isə 1 milyard 100 milyon 403 min manatdan 3 milyard 380 milyon 611 min manata yüksəlib.

Bazarlar üzrə ən böyük dövriyyə yenə repo əməliyyatlarında formalaşıb. 2026-cı ilin yanvar-iyun aylarında repo əməliyyatlarının həcmi 42 milyard 92 milyon 12 min manat təşkil edib. Bu göstərici illik müqayisədə 556 milyon 302 min manat və ya 1,3 faiz azalsa da, ümumi dövriyyədə payı 81,3 faizdən 92,4 faizə yüksəlib.

Dövlət istiqrazları üzrə dövriyyə kəskin azalıb. Bu bazarda dövriyyə 2025-ci ilin ilk yarısındakı 6 milyard 846 milyon 131 min manatdan 2026-cı ilin eyni dövründə 1 milyard 416 milyon 797 min manata düşüb. Azalma 5 milyard 429 milyon 334 min manat və ya 79,3 faiz təşkil edib.

Korporativ istiqrazlar bazarında da geriləmə müşahidə olunub. Bu seqment üzrə dövriyyə 2 milyard 275 milyon 263 min manatdan 1 milyard 105 milyon 794 min manata enib. Başqa sözlə, korporativ istiqrazlarda dövriyyə 51,4 faiz azalıb.

Bunun əksinə olaraq, Azərbaycan Mərkəzi Bankının qiymətli kağızları üzrə dövriyyə 24,1 faiz artaraq 809 milyon 343 min manata çatıb. Səhm bazarında isə dövriyyə 21 milyon 21 min manatdan 121 milyon 87 min manata yüksəlib.

Əməliyyatların sayına görə 2026-cı ilin ilk yarısında lider “PAŞA Kapital” olub. Şirkət 39 min 889 əməliyyat həyata keçirib. “ABB Invest” 15 min 647 əməliyyatla ikinci, “Troni İnvestisiya Şirkəti” QSC isə 5 min 381 əməliyyatla üçüncü yerdə qərarlaşıb.

Müqayisə göstərir ki, 2026-cı ilin ilk yarısında BFB-də əməliyyat aktivliyi artsa da, ümumi dövriyyə əsasən dövlət və korporativ istiqrazlar bazarındakı azalma səbəbindən aşağı düşüb. Dövriyyənin strukturu isə daha çox repo əməliyyatlarının dominantlığı ilə xarakterizə olunub.

İş elanları AzVak.az-da