“AzerGold” QSC-nin ilk dəfə satışa çıxardığı yerli xammal əsasında istehsal edilmiş 999,9 əyarlı gümüş külçələrin qiymətləri açıqlanıb.

Marja.az xəbər verir ki, “AzerGold”un onlayn satış platformasında yerləşdirilmiş məlumata əsasən, ilkin mərhələdə satışa 250 qram, 500 qram və 1000 qram çəkidə gümüş külçələr çıxarılıb.

Saytda göstərilən qiymətlərə görə, 1000 qramlıq gümüş külçə 5 min manata, 500 qramlıq külçə 2 min 555 manata, 250 qramlıq külçə isə 1 min 290 manata təklif olunur.

Beləliklə, 1000 qramlıq külçədə 1 qram gümüşün satış qiyməti 5 manat təşkil edir. 500 qramlıq külçədə bu göstərici 5 manat 11 qəpik, 250 qramlıq külçədə isə 5 manat 16 qəpikdir. Bu isə daha kiçik çəkili külçələrdə 1 qram üzrə qiymətin nisbətən yüksək olduğunu göstərir.

Müqayisə üçün, 500 qramlıq külçənin kiloqram ekvivalenti 5 min 110 manat, 250 qramlıq külçənin kiloqram ekvivalenti isə 5 min 160 manat təşkil edir. Başqa sözlə, 1000 qramlıq külçə ilə müqayisədə 500 qramlıq külçənin kiloqram üzrə qiyməti 110 manat və ya 2,2%, 250 qramlıq külçənin kiloqram üzrə qiyməti isə 160 manat və ya 3,2% yüksəkdir.

“AzerGold” QSC daha əvvəl yaydığı məlumatda bildirmişdi ki, gümüş külçələrin satışına ölkədə bu məhsula olan tələbatın yerli məhsullar hesabına qarşılanması və investisiya imkanlarının genişləndirilməsi məqsədilə başlanılıb.

Hər gün yeni vakansiyalar - AzVak.az-da

Şirkətin məlumatına görə, son illərdə yaşıl enerji texnologiyalarının sürətli inkişafı və elektronika sənayesində gümüşdən istifadənin artması bu qiymətli metalın qlobal bazardakı strateji rolunu gücləndirib. Eyni zamanda, beynəlxalq bazarlarda gümüşə tələbin yüksəlməsi onun investisiya aktivləri sırasında daha cəlbedici mövqe tutmasına şərait yaradıb.

Gümüş külçələrin bazara çıxarılması həm “AzerGold”un dəyər zəncirinin genişləndirilməsi, həm də vətəndaşlar üçün alternativ investisiya alətinin formalaşdırılması baxımından əhəmiyyətli addım kimi qiymətləndirilir.

İlkin mərhələdə alıcılara 250, 500 və 1000 qramlıq külçələr təqdim edilir. Növbəti mərhələdə isə bazar tələbatı, investor marağı və istehlakçı seçimləri nəzərə alınmaqla müxtəlif çəki kateqoriyalarında yeni çeşidlərin istehsalı planlaşdırılır.

Qeyd edək ki, gümüş külçələrin Satış və Mübadilə Mərkəzində milli valyuta ilə geri alışı da həyata keçiriləcək. Məhsullar istehlakçılardan Azərbaycan Respublikası Mərkəzi Bankının gündəlik rəsmi məzənnəsi əsas götürülməklə, külçənin metal dəyərinə 10% əlavə ödəniş tətbiq olunmaqla geri alınacaq.

Gümüş külçələr Bakı şəhəri, Bülbül prospekti, 3 ünvanında yerləşən Satış və Mübadilə Mərkəzində, həmçinin “AzerGold”un www.azergold.gift onlayn satış platformasında alıcılara təqdim edilir.

“AzerGold”un gümüş külçə satışına başlaması Azərbaycanda qiymətli metallara əsaslanan pərakəndə investisiya məhsullarının çeşidini genişləndirir. İndiyədək bazarda daha çox qızıl sikkə və külçələrə maraq müşahidə olunurdusa, gümüş külçələrin satışa çıxarılması daha aşağı büdcə ilə investisiya etmək istəyən alıcılar üçün alternativ yaradır.

Qiymət strukturundan görünür ki, daha böyük çəkili külçə alıcı üçün nisbətən sərfəlidir. 1000 qramlıq külçədə 1 qram üzrə qiymət 5 manat olduğu halda, 250 qramlıq külçədə bu göstərici 5 manat 16 qəpiyə yüksəlir. Bu fərq kiçik çəkili məhsullarda istehsal, qablaşdırma və satış xərclərinin 1 qram üzrə daha yüksək paya malik olması ilə izah oluna bilər.

Geri alış mexanizminin tətbiqi isə məhsulun investisiya cəlbediciliyini artıran əsas amillərdən biridir. Alıcılar üçün əsas məsələ yalnız məhsulu almaq deyil, gələcəkdə onu şəffaf mexanizmlə yenidən pula çevirmək imkanının olmasıdır. “AzerGold”un geri alış şərtləri bu baxımdan bazarda likvidlik və etimad yaratmağa xidmət edir.

Ümumilikdə, gümüş külçələrin satışa çıxarılması həm yerli xammalın daha yüksək əlavə dəyərli məhsula çevrilməsi, həm də Azərbaycanda alternativ investisiya alətlərinin genişlənməsi baxımından diqqətçəkən yenilikdir.

İş elanları AzVak.az-da