“Aqrarkredit” QSC Bank Olmayan Kredit Təşkilatı balansında olan bir sıra daşınmaz əmlakları müsabiqə yolu ilə satışa çıxarıb.

Marja.az xəbər verir ki, satışa çıxarılan əmlaklar əsasən Bakı şəhərinin Nərimanov, Yasamal, Səbail və Xətai rayonlarında, eləcə də Abşeron rayonunun Xırdalan şəhərində yerləşən qeyri-yaşayış sahələrindən ibarətdir.

Elana əsasən, yeni müsabiqəyə ümumilikdə 8 əmlak çıxarılıb. Bu əmlakların ümumi start qiyməti 9 milyon 6 min 120 manat təşkil edir. Satışa çıxarılan obyektlərin ümumi sahəsi isə 16 min 430,2 kvadratmetrdir.

Ən yüksək start qiyməti Bakı şəhəri, Nərimanov rayonu, Məmməd Araz küçəsi, 95 nömrəli ünvanda yerləşən 1078,1 kvadratmetrlik qeyri-yaşayış binası üzrə müəyyən edilib. Həmin əmlakın ilkin satış qiyməti 4 milyon 60 min manatdır.

İkinci ən bahalı əmlak Səbail rayonu, Zərifə Əliyeva küçəsi, 3 nömrəli ünvanda yerləşən 412,8 kvadratmetrlik qeyri-yaşayış sahəsidir. Bu obyektin start qiyməti 1 milyon 690 min 500 manat müəyyən olunub.

Yasamal rayonunda yerləşən iki iri qeyri-yaşayış sahəsi də satış siyahısına daxil edilib. Yeni Yasamal yaşayış massivində, Əsəd Əhmədov küçəsində yerləşən 5 948,3 kvadratmetrlik sahənin start qiyməti 770 min manat, 5 151,7 kvadratmetrlik digər sahənin start qiyməti isə 828 min 100 manatdır.

Bundan başqa, Xətai rayonunda Çingizxan Kərimov küçəsində yerləşən 1 025,5 kvadratmetrlik qeyri-yaşayış sahəsi 358 min 400 manata, Xırdalan şəhərində “Abşeron Gənclər şəhərciyi” yaşayış kompleksində yerləşən 1 624,1 kvadratmetrlik sahə 729 min manata, həmin kompleksdə yerləşən 1 155,7 kvadratmetrlik digər sahə isə 513 min manata satışa çıxarılıb.

Siyahıda ən aşağı start qiyməti Nərimanov rayonu, Ulyar Əliyev küçəsində yerləşən 34 kvadratmetrlik qeyri-yaşayış sahəsinə aiddir. Bu əmlakın ilkin satış qiyməti 57 min 120 manatdır.

Ərizələrin qəbulu 2 iyul 2026-cı il saat 10:00-dan 19 avqust 2026-cı il saat 16:00-dək aparılacaq. Müsabiqə qalibi 25 avqust 2026-cı il saat 11:00-da müəyyən ediləcək. Müsabiqə Azərbaycan Respublikasının Maliyyə Nazirliyində, Bakı şəhəri, Nəsimi rayonu, Səməd Vurğun küçəsi 135 ünvanında keçiriləcək.

İddiaçılar əmlakın elan olunan ilkin satış dəyərinin 0,5 faizi həcmində beh ödəməlidirlər. Müsabiqədə ən yüksək qiymət təklif edən iddiaçı qalib elan olunacaq. Qalib əmlakın dəyərini 30 bank günü ərzində tam ödəmək barədə yazılı zəmanət təqdim etməlidir.

Elana görə, “Aqrarkredit”in daha əvvəl “Xalq qəzeti”ndə dərc olunmuş bəzi əmlaklarının təkrar müsabiqəyə çıxarılması üzrə müddət də uzadılıb. Həmin əmlaklar üzrə ərizələrin qəbulu 15 iyul 2026-cı il saat 16:00-dək davam edəcək, qalib isə 17 iyul 2026-cı il saat 11:00-da müəyyən ediləcək.

Satışa çıxarılan əmlak portfelinin strukturuna baxdıqda, əsas həcmin iri qeyri-yaşayış sahələrinin payına düşdüyü görünür. Xüsusilə Yasamal rayonundakı iki böyük sahənin ümumi sahəsi 11 min kvadratmetrdən çoxdur. Lakin onların kvadratmetr üzrə qiyməti Nərimanov və Səbail rayonundakı obyektlərlə müqayisədə xeyli aşağıdır. Bu, obyektlərin yerləşmə səviyyəsi, funksional təyinatı, texniki vəziyyəti və likvidlik göstəriciləri ilə bağlı ola bilər.

Ən yüksək kvadratmetr qiyməti Səbail rayonunda yerləşən obyekt üzrə formalaşıb. Bu əmlakın 1 kvadratmetr üçün start qiyməti təxminən 4 min 95 manatdır. Nərimanov rayonunda Məmməd Araz küçəsində yerləşən qeyri-yaşayış binasında isə bu göstərici təxminən 3 min 766 manatdır. Bu iki obyekt daha likvid və kommersiya baxımından cəlbedici aktivlər kimi qiymətləndirilə bilər.

İş elanları AzVak.az-da