Azərbaycan Mərkəzi Bankı (AMB), proqnozlara görə, 2026-cı il ərzində uçot dərəcəsini 6,5 % səviyyəsində saxlayacaq.

Niderlandın ən böyük bank qrupu olan "ING Group"un ekspertləri belə hesab edirlər.

"ING Group" analitiklərinin qiymətləndirmələrinə görə, Azərbaycanın tənzimləyici qurumu uçot dərəcəsini 2027-ci il ərzində dəyişməyərək 6,5 % səviyyəsində saxlaya bilər.

Bununla yanaşı, 2028-ci ildə uçot dərəcəsinin 50 baza bəndi azaldılaraq 6 %-ə endiriləcəyi proqnozlaşdırılır.

Xatırladaq ki, AMB-nin İdarə Heyəti iyunun 24-də keçirilən son iclasında uçot dərəcəsinin 6,5 % səviyyəsində saxlanılması barədə qərar qəbul edib.

Qeyd edək ki, 2025-ci ildə Mərkəzi Bank uçot dərəcəsinə həsr olunmuş 8 iclas keçirib. Onlardan 6-da dərəcə dəyişməyib, 2 dəfə isə dərəcənin azaldılması (hər dəfə 25 baza bəndi) barədə qərar qəbul edilib.

AMB bu il də uçot dərəcəsinə həsr olunmuş 8 iclas keçirəcək. Faiz dəhlizinin parametrləri növbəti dəfə iyulun 31-də nəzərdən keçiriləcək.

XXX

Niderlandın ən böyük bank qrupu olan "ING Group" Azərbaycanda illik inflyasiyanın cari ildə 5,8 %, 2027-ci ildə isə 5,6 % səviyyəsində olacağını proqnozlaşdırır.

ING-nin yenilənmiş məlumatlarına görə, əvvəl dərc olunmuş proqnozla müqayisədə cari il üzrə inflyasiya gözləntiləri 0,3 faiz bəndi (f.b.), 2027-ci il üzrə proqnoz isə 0,1 f.b. artırılıb.

Bundan əlavə, bank qrupu ilk dəfə olaraq 2028-ci il üzrə proqnozunu da açıqlayıb. ING-nin hesablamalarına görə, 2028-ci ildə inflyasiya səviyyəsi 5,3 %-ə çatacaq.

Dövlət Statistika Komitəsinin məlumatlarına görə, Azərbaycanda orta illik inflyasiya 2025-ci ildə 5,6 % təşkil edib. Bu göstərici 2024-cü ildə 2,2 % olub. 2026-cı ilin yanvar-may aylarında isə ölkədə orta illik inflyasiya 5,6 % təşkil edib.

Bankın analitikləri orta illik inflyasiyanın bu ilin ikinci rübündə 5,7 % (əvvəlki proqnoz 5,5 % idi), üçüncü rübdə 5,8 % (əvvəlki proqnoz - 5,4 %) və dördüncü rübdə 5,6 % (əvvəlki proqnoz - 5,6 %) olacağını gözləyirlər.

Azərbaycanın İqtisadiyyat Nazirliyinin proqnozlarına görə, ölkədə orta illik inflyasiya 2026-cı ildə 4,8 %, 2027-ci ildə isə 4,5 % təşkil edəcək. Azərbaycan Mərkəzi Bankının son proqnozlarına görə (may ayında açıqlanmış), cari ildə illik inflyasiya təxminən 5,9 % təşkil edəcək.

BMT isə bu il Azərbaycanda inflyasiyanı 3,1 % səviyyəsində proqnozlaşdırır. Dünya Bankı 2026-cı ildə Azərbaycanda orta illik inflyasiyanın 2,3 %, Asiya İnkişaf Bankı isə 3,5 % səviyyəsində olacağını gözləyir.

"Moody's" beynəlxalq reytinq agentliyi, cari ildə Azərbaycanda orta illik inflyasiyanı 3 %, "Fitch Ratings" 4,6 %, "Fitch Solutions" isə 2026-cı ildə 5,5 %, 2027-ci ildə isə 4,8 % səviyyəsində proqnozlaşdırır.

İş elanları AzVak.az-da

© "Report"