ING analitiklərinin fikrincə, dollar üzrə qısamüddətli risklər bir qədər yuxarı istiqamətli olsa da, dollar indeksinin (DXY) 2025-ci ilin may ayında gördüyü yüksək səviyyəyə yenidən çatması çətin görünür. Analitiklər avro/dollar məzənnəsinin yaxın zamanda 1,14 səviyyəsindən aşağı düşə biləcəyini düşünürlər (avronun ucuzlaşacağı, dolların bahalaşacağı gözlənilir).

Hazırda avro dollar məzənnəsi 1,1428 səviyyəsindədir.

Francesco Pesole və Frantisek Taborskı cümə axşamı ABŞ-da açıqlanacaq mühüm inflyasiya göstəricisi olan baza PCE və şəxsi istehlak xərcləri məlumatlarına istinad edərək bildiriblər: “Bazarlar növbəti məlumatları və ya FED rəsmilərinin açıqlamalarını katalizator kimi istifadə edərək 2026-cı ildə FED-in 50 baza bəndlik sərtləşdirmə addımını qiymətlərə daxil etməyə çalışa bilər. Lakin Yaxın Şərqdə yeni gərginlik yaşanmadığı təqdirdə, aşağı neft qiymətləri dolların qazancını məhdudlaşdıracaq”.

Analitiklər ediblər: “Qısamüddətli risklər yuxarı istiqamətli olaraq qalır, lakin ötən həftəni yeni güclü dollar dövrünün başlanğıcı kimi görmürük”.

DXY ötən həftə ərzində ümumilikdə 1,1 faiz yüksəlib.

Fed-dən gözləntilər

FED, ötən həftə yeni sədr Kevin Warsh-ın rəhbərliyi ilə keçirdiyi ilk iclasda faiz dərəcələrini sabit saxlasa da, iclasdan verilən mesajlar “şahin” kimi qiymətləndirilib və investorlar bu il ABŞ-da faiz artımı ehtimalını qiymətlərə daxil etməyə başlayıblar.

“Avro/dollar məzənnəsinin yüksəliş trendinə başlamazdan əvvəl 1,14 səviyyəsini test etmə ehtimalının kifayət qədər yüksək olduğunu düşünürük”, - deyən analitiklər əlavə ediblər: “Eyni zamanda, ABŞ-İran danışıqlarından gələn müsbət xəbərlər növbəti eniş dalğasının dərinliyinin daha məhdud olacağına işarə edir”.

Analitiklər Avrozonada açıqlanan məlumatların avro/dolların hərəkətində həlledici rol oynayacağının gözlənilmədiyini, bu hərəkətlərin böyük ölçüdə ABŞ dollarının istiqamətindən asılı olacağını bildiriblər.

İngiltərədə siyasi çalxalanma

İngiltərədə baş nazir Keir Starmerin istefa qərarı və Andy Burnhamın onun yerinə keçməyə hazırlaşması ilə bağlı yaşanan siyasi çalxalanmaya da toxunan analitiklər bu proseslərin sterlinq üçün problem yaratmadığını bildiriblər. Analitiklər sterlinqlə bağlı belə qiymətləndirmə aparıblar: “Avro/sterlinq üzrə mövqeyimiz ümumilikdə yüksəliş istiqamətlidir. Lakin bunun əsas səbəbi, qiymətlərə 33 baza bəndlik artım daxil edilsə də, İngiltərə Mərkəzi Bankının faiz artımına gedəcəyini gözləməməyimizdir”.