Azərbaycan Respublikası Mərkəzi Bankının İdarə Heyətinin faiz dəhlizinin parametrlərinə dair növbəti qərarı barədə press-reliz 23 iyul 2025-ci il tarixində saat 10:00-da yayımlanacaqdır. Saat 11:00-da Mərkəzi Bankda mətbuat konfransı da keçiriləcəkdir.

Marja.az xəbər verir ki, bu gün Mərkəzi Bank 2025-ci il üzrə 5-ci faiz qərarını açıqlayacaqdır. 

Ardıcıl 9 iclasdır Mərkəzi Bank faizlərini dəyişməz saxlayır. İyunun 11-də də Azərbaycan Respublikası Mərkəzi Bankının İdarə Heyətinin qərarı ilə uçot dərəcəsi 7.25%, faiz dəhlizinin aşağı həddi 6.25%, faiz dəhlizinin yuxarı həddi isə 8.25% səviyyəsində dəyişməz saxlanılıb.

MƏRKƏZİ BANK NƏ DEMİŞDİ?

11 İyun 2025-ci il tarixində Mərkəzi Bankın yaydığı press-relizdə bildirilmişdi ki, ümumilikdə, mövcud pul siyasəti inflyasiyanın hədəf daxilində saxlanılmasına və inflyasiya gözləntilərinin sabitləşməsinə yönəlib. İnflyasiyanın xarici mühitində qeyri-müəyyənliklərin azalması növbəti iclasda uçot dərəcəsinin azaldılması üçün zəmin yarada bilər.

"Faiz dəhlizinin parametrləri ilə bağlı növbəti qərarlar faktiki və proqnozlaşdırılan inflyasiya, xarici və daxili risk amillərinin dinamikasından asılı olaraq veriləcəkdir. Mərkəzi Bank bundan sonra da qiymət sabitliyini təmin etmək üçün sərəncamındakı bütün vasitələrdən istifadə edəcəkdir".

2025-ci ilin iyun ayıda Azərbaycanda illik inflyasiyanın sürəti maydakı 6,3%-dən 6%-ə geriləyib. Bu azalma əsasən müvsimi amillər ilə əlaqədardır. Yay aylarında əksər meyvə və tərəvəz qiymətləri düşüdüyü üçün, iyunda qida məhsulları üzrə deflyasiya qeydə alınıb, bu da ümumi indeksin aşağı düşməsinə təsir göstərir. 

Xarici mühitində qeyri-müəyyənliklər davam etsə də, qiymətlərdə kəskin artımlar müşahidə olunmur. Beynəlxalq Valyuta Fondunun (BVF) məlumatına görə, 2025-ci ilin iyun ayında qlobal ümumi əmtəə qiymətləri indeksi 160,5 bənddən 165,8 bəndə yüksəlib (3,3% artıb). FAO-nun Ərzaq Qiymətləri İndeksi 2025-ci ilin iyun ayında may ayına nisbətən 0,7 bənd (0,5 faiz) artaraq 128 bənd təşkil edib. Süd məhsulları, ət və bitki yağlarının qiymətlərindəki artımlar taxıl və şəkərin qiymət indekslərindəki azalmaları üstələmişdir.

"Faizləri azaltmaq istəyirdik, lakin qlobal qeyri-müəyyənliklərə görə, gözləmə mövqeyində qaldıq"

23 Aprel 2025-ci il tarixində faiz qərarından sonra Mərkəzi Bankda keçirilmiş mətbuat konfransında Sədr Taleh Kazımov növbəti dəfə  faizlərdə dəyişiklik edilməməsinin səbəbini açıqlamışdı:

"Açıq etiraf edim ki, bu dəfə də bizim pauza götürməyimizin səbəbi qlobal qeyri-müəyyənliklərdir. Mart-aprel aylarında beynəlxalq aləmdə baş verən hadisələr olmasaydı, biz yəqin ki, yumşalma istiqamətində qərar qəbul edəcəkdik, faizlər aşağı düşsün. Yenə də biz gözləmə mövqeyində qalmaq barədə qərar qəbul etdik".

İyulun 23-də də Azərbaycan Mərkəzi Bankının faizlərini aşağı salacağı ehtimalı var. Eyni zamanda, Mərkəzi Bank daha sağlam qiymət hərəkətlərini görmək üçün pauza rejimində qalmaqda davam edə və faizləri bu dəfə də sabit saxlya bilər.