PAŞA Holding-in törəmə şirkətlərindən olan “Agro Dairy” şirkəti fəaliyyətinin 10 illik yubileyini qeyd edib. 

“Agro Dairy” şirkəti ölkədə ərzaq təhlükəsizliyinin təmin olunması və müvafiq dövlət proqramlarının icrası zərurətindən irəli gələrək 2014-cü ilin sonunda təsis edilmiş, 2015-ci ildən etibarən fəaliyyətə başlamışdır. Hazırda 14 ixtisaslaşmış müəssisəni özündə birləşdirən şirkət bu əlamətdar günü əməkdaşlarının iştirakı ilə təşkil olunan xüsusi tədbirlə qeyd edib.

Yubiley tədbirinə açılış nitqi ilə başlayan şirkətin Baş icraçı direktoru Niyazi Əmirbəyov bütün qonaqları salamlayaraq bildirib:

“Agro Dairy olaraq 10 il əvvəl fəaliyyətə başladığımız ilk gündən etibarən regionlarda istifadəsiz qalmış torpaq sahələrini bərpa edərək onları kənd təsərrüfatı üçün yararlı və yüksək məhsuldarlığa malik ərazilərə çevirməyə nail olmuşuq. Şirkətimiz yerli fermerlərin yüksək məhsuldarlığa malik və stress amillərinə davamlı toxumlara olan ehtiyacını qarşılayaraq, onlara birinci reproduksiyalı və sertifikatlaşdırılmış toxumlar təqdim etməklə daim dəstək göstərir. İllər öncə 100 nəfərə yaxın əməkdaşla başladığımız bu yolda bu gün artıq 3000 nəfərlik böyük bir komandaya çevrilmişik. Bu göstəricilər sübut edir ki, qarşıdakı illərdə sürətlə böyüyəcək və fəaliyyət sahəmizi daha da genişləndirəcəyik.

Ən böyük məmnuniyyətimiz odur ki, missiyamız, strategiyamız və hədəflərimiz Azərbaycanın və regionun ərzaq təhlükəsizliyinin təmin olunmasına yönəlib. İnanırıq ki, əməkdaşlarımızın səyi və partnyorlarımızla birgə atdığımız addımlar nəticəsində bu hədəflərə uğurla nail olacağıq."

Daha sonra Niyazi Əmirbəyov çıxış üçün PAŞA Holding-in Baş icraçı direktoru Cəlal Qasımova söz verib. Cəlal Qasımov “Agro Dairy” kollektivini 10 illik yubiley münasibətilə təbrik edərək bildirib ki, bu gün iqtisadi qeyri-müəyyənliklər, bazar rəqabətinin artması və xüsusilə təbiət amillərindən asılı olan bir sahədə fəaliyyət göstərərək 10 illik inkişaf yolunu uğurla keçmək və bu yubileyi qeyd etmək olduqca önəmli və dəyərli hadisədir.

O qeyd edib ki, bu illər ərzində göstərilən birgə əmək nəticəsində bu gün ölkənin aparıcı kənd təsərrüfatı şirkətlərindən birinin yubileyinə şahidlik etmək hər birimiz üçün böyük qürur mənbəyidir. “Agro Dairy” artıq 10 ildir ki, Azərbaycanın kənd təsərrüfatı sahəsində davamlı inkişafın əsas aparıcı qüvvələrindən biri kimi mühüm rol oynayır.

Şirkəti təbrik edən fəxri qonaqlar çıxışlarını yekunlaşdırdıqdan sonra, “Agro Dairy” şirkəti yarandığı gündən 10 illik fəaliyyəti dövründə çalışan əməkdaşlar xüsusi nominasiyalarla təltif olunublar.

Rəsmi hissənin başa çatması ilə proqram musiqili çıxışlar, rəqslər və əyləncəli oyunlarla davam edib.