Prezidenti Donald Trampın ABŞ-ın ticarət tərəfdaşlarına tariflər (gömrük rüsumları) elan etməsindən sonra artan gərginlik və tariflərin yaradacağı qlobal iqtisadi yavaşlama ilə bağlı narahatlıqlar fonunda Avropada təbii qaz bir həftə ərzində 20% ucuzlaşıb

Marja xəbər verir ki, Hollandiyada yerləşən virtual təbii qaz ticarət məntəqəsi olan TTF-də  təbii qazın meqavat-saat qiyməti aprelin 2-də 41,2 avro səviyyəsində bağlanmışdı.

ABŞ prezidenti Trampın ölkəsi üçün “qurtuluş günü” kimi xarakterizə etdiyi və ticarət tərəfdaşlarına qarşılıqlı tariflər tətbiq etdiyi aprelin 2-dən sonra Avropada qazın qiyməti bir həftə ərzində kəskin düşüb.

Aprelin 3-də Avropada bir meqavat-saat qazın qiyməti 39,2 avro səviyyəsində açılsa da, ucuzlaşma sonra da davam edib.

ABŞ və Çin arasında tarif qarşıdurmasının artan intensivliyi də qiymətlərin enmə tempini sürətləndirib. Belə ki, aprelin 2-dən sonra Avropada qazın qiyməti 20 faiz düşüb. Bu həftənin əvvəlindən qiymətlər 9,2 faiz ucuzlaşıb.

Bu azalma ilə qaz qiymətləri 2024-cü ilin may ayından bəri ən aşağı səviyyəyə enib.

Qlobal iqtisadiyyatda, o cümlədən Çində təbii qaza tələbin potensial zəifləməsi ehtimalı qiymətlərə mənfi təsir edir.

Tariflərdən sonra qlobal iqtisadi tənəzzüllə bağlı proqnozlar və bu tənəzzülün qaza olan tələbatı zəiflədəcəyi ilə bağlı narahatlıqlar qiymətlərin azalmasına təkan verib. 

Bundan əlavə, Çinin ABŞ-a qarşı cavab rüsumlarından sonra ABŞ-ın mayeləşdirilmiş təbii qaz (LNG) tədarükünün Çin və Asiyadan daha çox Avropaya yönələ biləcəyinə dair gözləntilər də qaz qiymətlərinin enməsində rol oynayıb.

Digər tərəfdən, Çin və ABŞ arasında tariflərin artmasından sonra Çində iqtisadi artımın yavaşlaması və xüsusilə sənayedə qaz istehlakında azalma tendensiyası Çinin ümumi qaz tələbatı ilə bağlı narahatlıqları artırıb.

ABŞ-ın investisiya bankı Goldman Sachs tariflərin iqtisadi təsirinə görə, Çin iqtisadiyyatı üçün artım proqnozunu bu il 4 faizə, 2026-cı il üçün isə 3,5 faizə endirib. Bank əvvəllər Çin iqtisadiyyatının bu il 4,5 faiz, 2026-cı ildə isə 4 faiz artacağını proqnozlaşdırmışdı.

Sonuncu dəfə, Çinin ABŞ-a qarşı 84 faizlik cavab rüsumunun tətbiqindən sonra, ABŞ Çinə 125 faizlik rüsum tətbiq edib. Dünən ABŞ-ın Çin mallarına tarifi 145%-ə qaldıracağı barədə məlumat yayılıb. İki ölkə arasında “qisasa-qisas” yanaşması qlobal iqtisadiyyat və ticarətlə bağlı qeyri-müəyyənliyi getdikcə artırır.