Rusiya Energetika Nazirliyinin statistikası ilə tanış olan “Kommersant” mənbələrinin verdiyi məlumata görə, fevralda ölkənin qaz hasilatı ötən ilin eyni dövrü ilə müqayisədə 11,3% azalaraq 57,2 milyard kubmetr təşkil edib. Fevralda hasilatın azalma tempi yanvar ayı ilə müqayisədə (3 faiz azalma) daha yüksək olub. İki ayın yekunlarına görə, 131 milyard kubmetr qaz hasil edilib ki, bu da bir il əvvəlkindən 7,3% azdır. Bu rəqəmlər “Qazprom”un rəqəmlərini əks etdirir. “Digər istehsalçıların” hasilatı, fevralda illik müqayisədə 13,2% azalaraq 38,2 milyard kubmetrə, iki ayda isə 8% azalaraq 81,5 milyard kubmetrə düşüb.

Marja xəbər verir ki, hasilatın səviyyəsinə yanvarın 1-dən etibarən Rusiya qazının Ukrayna ərazisindən tranzitinin dayandırılması mənfi təsir göstərir.

“Qazprom”un Avropaya yalnız bir boru kəməri yolu qalıb: “Türk axını”nın gücü ildə 16 milyard kubmetrdən bir qədər azdır. Rusiya həmçinin Avropa ittifaqına LNG şəklində qaz tədarükünü davam etdirir.

Ən böyük özəl qaz istehsalçısı NOVATEK fevralda hasilatı 1,5% azaldaraq 6,4 milyard kubmetrə, iki ay ərzində isə 1,4% azalaraq 13,6 milyard kubmetrə endirib. LUKOIL-un hasilatı fevralda 13,3% azalaraq 1,3 milyard kubmetrə, ilin əvvəlindən isə 9,7% azalaraq 2,8 milyard kubmetrə düşüb. “Rosneft” fevralda qaz hasilatını 14% azaldaraq 5,5 milyard kubmetrə, iki ayda “isə 12% azaldaraq 11,6 milyard kubmetrə endirib. “Qazprom Neft”in qaz hasilatı fevralda 8,3% azalaraq 2,2 milyard kubmetrə, iki ayda isə 5% azalaraq 4,8 milyard kubmetrə düşüb.

Xarici layihələrdə də istehsal aşağı düşüb.

Rusiya Milli Enerji Təhlükəsizliyi Fondu rəhbərinin müavini Aleksey Qrivaç hesab edir ki, hasilatın azalmasının əsas səbəbi anomal isti hava şəraiti fonunda tələbatın azalması və Ukrayna ərazisindən keçən ixrac marşrutunun bağlanmasıdır. 

“Kommersant” mənbəsi qeyd edib ki, Rusiyada iqtisadi fəallığın azalması səbəbindən enerji tutumlu sənayelərdə (polad istehsalı, tikinti materialları, əsas kimyəvi maddələr) tələbatın azalması da qaz istehlakına çox güman ki, mənfi təsir göstərməyə başlayır.