Almaniyanın əczaçılıq və kimya şirkəti "Bayer", qlifosat tərkibli pestisid olan "Roundup"ın xərçəngin inkişafında əsas faktor olduğunu iddia edənlərin ABŞ-da açdıqları məhkəmə iddialarını uduzmaqda davam edir.

Marja.az xəbər verir ki, Corciya məhkəməsinin heyəti "Bayer"ə alaq otlarının "qatili" olan "Roundup"ın xərçəngə səbəb olması daxil olmaqla zərərli olduğunu iddia edən iddiaçıya 2,1 milyard dollar ödəməyi əmr edib.

Həmçinin məhkəmə müəyyən edib ki, "Bayer" "Roundup"dan istifadənin potensial risklərini adekvat şəkildə açıqlamayıb və iddiaçıları herbisidin təhlükələri barədə xəbərdar etmədiyinə görə məsuliyyət daşıyır.

2,1 milyard dollarlıq təzminat ABŞ-da qlifosat tərkibli pestisid "Roundup" ilə bağlı başlamış məhkəmələrdə indiyə qədər verilən ən yüksək təzminatlardan biridir.

Qərardan apellyasiya şikayəti veriləcək

"Bayer", qlifosat haqqında iddiaları rədd edərək, məhkəmənin qərarı ilə razılaşmadığını, çünki qərarın elmi sübutlara, tənzimləyici qurumların konsensusuna və bütün dünyada elmi qiymətləndirmələrə zidd olduğunu bildirib. Şirkət bütün digər işlərdə olduğu kimi Corciyada da son qərardan apellyasiya şikayəti verəcək.

Almaniya şirkəti onu da qeyd edib ki, yekun hökm çıxaran işlərdə təzminat məhkəmə heyətinin ilkin hökmləri ilə müqayisədə 90 faiz azalıb.

Qərardan sonra "Bayer"in səhmləri bu gün birjada dəyərinin 6 faizindən çoxunu itirib.

2018-ci ildə "Bayer" ABŞ-ın kənd təsərrüfatı şirkəti "Monsanto"nu 63 milyard dollara satın aldıqdan sonra, şirkət tərəfindən hazırlanmış qlifosat tərkibli pestisid "Roundup"ın xərçəngin inkişafında əhəmiyyətli faktor olduğunu iddia edənlər tərəfindən məhkəmələrdə qaldırılan iddialarda milyardlarla dollar cərimə və təzminat ödəməyə məhkum edilib. 

"Bayer" qlifosatla bağlı iddiaları rədd etsə də, 2015-ci ildə Beynəlxalq Xərçəng Araşdırmaları Agentliyi (IARC) qlifosatı kanserogen kimi təsnif edib.

"Bayer" 2020-ci ildə ABŞ-da ona qarşı açılan iddialarda razılığa gəldiyini və iddiaçılara 10,9 milyard dollar ödənəcəyini açıqlayıb. Razılaşmaya baxmayaraq, şirkət hələ də "Roundup" ilə bağlı 60 mindən çox məhkəmə iddiası ilə üzləşib. Almaniya şirkəti sözügedən məhkəmə prosesləri üçün 5,9 milyard dollar hüquqi ehtiyat ayırıb.