Bu il Azərbaycanda ümumi daxili məhsulun (ÜDM) nominal həcmi 74,98 milyard ABŞ dolları (127,466 milyard manat) təşkil edəcək və gələn il 77,86 milyard ABŞ dollarına (132,362 milyard manat) qədər artacaq.

"S&P Global" beynəlxalq reytinq agentliyinin proqnozlarına görə, 2025-2026-cı illərdə ölkədə ÜDM-in real artımı 2 % səviyyəsində proqnozlaşdırılır.

Agentlik hesab edir ki, əhalinin hər nəfərinə düşən ÜDM 2025-ci ildə 7 min 277 ABŞ dollarına çatacaq, 2026-cı ildə isə 7 min 511 ABŞ dollarına yüksələcək.

İqtisadiyyat Nazirliyi 2025-ci ildə ölkədə iqtisadi artımı 3,5 %, Mərkəzi Bank isə 3,3 % səviyyəsində proqnozlaşdırır.

“Moody’s” beynəlxalq reytinq agentliyinin proqnozlarına görə, 2025-ci ildə Azərbaycanda ÜDM-in real artımı 4 % təşkil edəcək. “Fitch Ratings” ölkə üzrə ÜDM-in 2025-ci ildə 3 %, 2026-cı ildə isə 2,4 % artacağını proqnozlaşdırır. Niderlandın ING bankı bu il Azərbaycanda iqtisadi artımı 2,6 %, gələn il isə 2,8 % səviyyəsində gözləyir.

2024-cü ildə Azərbaycan iqtisadiyyatı 4,1 % artıb, nominal ÜDM 126,337 milyard manat (74,315 milyard ABŞ dolları) təşkil edib.

XXX

“S&P Global” beynəlxalq reytinq agentliyi 2025-ci ildə Azərbaycanda orta illik inflyasiyanı 4 % səviyyəsində proqnozlaşdırır.

S&P-nin proqnozlarına görə, 2026-cı ildə ölkədə inflyasiya 3 %-ə qədər azalacaq.

İqtisadiyyat Nazirliyi ölkədə illik inflyasiyanı 2025-ci ildə 4,6 %, 2026-cı ildə 4 % səviyyəsində gözləyir. Azərbaycan Mərkəzi Bankının son proqnozlarına (2025-ci ilin yanvarında) görə, bu il inflyasiya 5,5 %, 2026-cı ildə isə 3,8 % olacaq.

Öz növbəsində, Birləşmiş Millətlər Təşkilatı (BMT) Azərbaycanda inflyasiyanın bu il 3,6 %, 2026-cı ildə isə 3,1 % təşkil edəcəyini proqnozlaşdırır. Niderlandın “ING Group”u ölkədə istehlak qiymətlərinin 2025-ci ildə 4,8 %, 2026-cı ildə isə 4,7 % artacağını gözləyir.

Xatırladaq ki, ötən il Azərbaycanda orta illik inflyasiya 2,2 % təşkil edib. 2025-ci ilin yanvar ayında istehlak qiymətləri 5,4 % artıb.

© "Report"