InvestAZ İnvestisiya şirkətinin analitikləri bu həftə üzrə dünya maliyyə bazarlarında son vəziyyət və qısa müddət ərzində gözlənilənlərlə bağlı məlumat verib.

EUR

Maliyyə bazarlarında EUR/USD məzənnəsi son bir həftə 1.1880$-a kimi təqribən 2% ucuzlaşıb. Məzənnə üzrə texniki təhlillər isə onu göstərir ki, qiymət 1.1824$-a kimi ucuzlaşarsa, əlavə olaraq 1.1730$-a kimi də ucuzlaşa bilər.

Bu həftə investorlar üçün xüsusilə önəmlidir. Belə ki, cümə axşamı Bakı vaxtı ilə saat 16:30-da Avropa Mərkəzi Bankının sədri Mario Draqinin mətbuat konfransı keçiriləcəkdir və sədrin yumşaq monetar siyasətin gələcəyi ilə bağlı verəcək mesajları investorlar böyük maraqla gözləyirlər.

GBP

Funt sterlinqin qiyməti keçən həftə 1.30$-ın altında ticarət olunub. GBP/USD qiyməti üzrə təhlillər isə onu göstərir ki, qiymət bu həftə də 1.30$-ın altında ticarət olunmağa davam edərsə, 1.2770$ və 1.2690$-a kimi ucuzlaşmağa başlaya bilər.

Bununla yanaşı, keçən həftə baş tutan üçüncü “BREKSİT” danışıqları da Avropa Birliyinin İngiltərəyə qarşı sərt tələbləri ilə yadda qalıb.

TRY

Türkiyə valyuta bazarlarında Türk lirəsi qiyməti də bahalaşmaqda davam edir. Lakin maliyyə bazarlarında qiymətin əlavə olaraq 3.40TL-ə kimi bahalaşmaqda davam edə biləcəyi gözləntiləri olsa da, qiymətin ilin sonuna doğru istiqamət dəyişərək, 3.55TL-ə kimi ucuzlaşa biləcəyi proqnozları da güclənməkdədir.

OIL

Avropanın Brent markalı neftinin bir barel qiyməti keçən həftənin ilk yarısında 50$-a kimi ucuzlaşsa da, yenidən 52$-ın üzərində ticarət edilir. Gələcək günlər ərzində qiymət 52.80$-a kimi dəyər qazanarsa,  artım dalğasının 53.33$-a kimi də sürətlənə biləcəyi proqnozlaşdırılır. Qeyd etmək lazımdır ki, ABŞ-da neft ehtiyatlarının azalması dinamikasının güclənməsi və ABŞ-da baş verən güclü təbii hadisələr, keçən həftə neft qiymətlərinə dəstək olan amillər olub.

GOLD

Əlvan metallar bazarlarında da qızılın qiyməti bahalaşmaqda davam edir. Dünyada siyasi və iqtisadi risklərin artması, qızılın bir unsiya üzrə qiymətinin 1338$-a (42.9 $/qram) kimi dəyər qazanmasına təsir edib. Təhlillərə əsasən, maliyyə bazarlarında qızıl qiymətləri 1352$-a (43.4 $/qram) kimi də bahalaşa bilər.

İnvestisiya ilə bağlı suallarınızı *1234 telefon nömrəsi və www.investaz.az veb saytı vasitəsilə bizə ünvanlaya bilərsiniz.

“İnvest-AZ İnvestisiya Şirkəti” QSC-nin Analitika Departamenti

“İnvest-AZ İnvestisiya Şirkəti” Qapalı Səhmdar Cəmiyyətinin fəaliyyəti Azərbaycan Respublikası Maliyyə Bazarlarına Nəzarət Palatası tərəfindən tənzimlənir. Şirkət, 09.01.2016-cı il tarixli 087986 saylı lisenziyası əsasında broker, anderraytinq (diler), marja ticarəti (forex), fərdi investorların portfelinin idarə edilməsi, market meykerlik və sair investisiya xidmətləri üzrə fəaliyyət göstərməkdədir.

Risk bildirişi.

Yuxarıda göstərilən məlumatlar tamamilə tövsiyə xarakterlidir. Bu fəaliyyət üzrə həyata keçirilən əməliyyatlar yüksək risk qrupuna daxildir və “İnvest-AZ İnvestisiya Şirkəti” QSC yuxarıda göstərilən məlumatlar əsas götürülməklə, həyata keçirilən investisiya əməliyyatları üzrə heç bir öhdəlik daşımır.