Bakı vaxtı ilə saat 11:50-yə olan məlumata görə, beynəlxalq bazarlarda Brent markalı neftin bir barreli 72,39 dollara satılır.

Marja xəbər verir ki, ötən gün 74,13 dollara kimi bahalaşan Brent markalı neftin bir barelinin qiyməti günü 72,44 dollarla başa vurub. West Texas Intermediate (WTI) markalı xam neftin bir barreli 68,55 dollara satılır.

Neftin qiymətinin enməsinə dünyanın ən böyük neft idxal edən ölkəsi olan Çində iqtisadi yavaşlamanın tələbi azaldacağı ilə bağlı narahatlıq təsir edir.

Çin iqtisadiyyatı bu ilin 9 ayında 4,8 faiz böyüyərək, hökumətin ilin sonunda "təxminən 5 faiz" olan artım hədəfini tam yerinə yetirməyib.

Çində xidmət sektorunda fəaliyyətin barometri hesab edilən Ümumi Xidmətlərin Satınalma Menecerləri İndeksi (PMI), oktyabr ayında bərpa olunduqdan sonra noyabr ayında yenidən yavaşlamağa işarə edib. İndeks noyabrda əvvəlki ayla müqayisədə 0,5 bənd azalıb. Milli Statistika Bürosu (UIB) tərəfindən açıqlanan qeyri-istehsal PMI indeksi daxilində xidmətlər alt indeksi noyabr ayında əvvəlki ayla müqayisədə dəyişməyərək 50,1 səviyyəsində sabit qalıb.

Ekspertlər bildirirlər ki, ölkədə zəif daxili tələb və deflyasiya tendensiyası iqtisadi artıma mənfi təsir göstərməkdə davam edir.

ABŞ-da Təchizat İdarəetmə İnstitutunun (ISM) xidmət sektorunun Satınalma Menecerləri İndeksi (PMI) noyabrda aylıq müqayisədə 3,9 bənd azalaraq, bazar gözləntilərindən aşağı olmaqla 52,1-ə düşüb. Oktyabrda ölkədə zavod sifarişləri proqnozdan aşağı olmaqla 0,2 faiz artıb. Dünyada ən çox neft istehlak edən ABŞ-da iqtisadi yavaşlama ilə bağlı narahatlıq qiymətlərə təzyiq göstərir.

ABŞ-da Enerji İnformasiya İdarəsinin (EIA) məlumatlarına görə, kommersiya xam neft ehtiyatlarına daxil olmayan strateji xam neft ehtiyatları təxminən 1 milyon 400 min barrel, benzin ehtiyatları isə təxminən 2 milyon 400 min barrel artıb. Ölkədə ehtiyatların artması neftin qiymətinin aşağı düşməsinə dəstək verir və tələbin yavaşladığını göstərir.

Digər tərəfdən, ABŞ Federal Ehtiyat Sisteminin (FED) sədri Jerome Powell-in (Cerom Pauell) ABŞ iqtisadiyyatının yaxşı vəziyyətdə olduğunu və bunun onlara faiz dərəcələrini azaltmaq üçün imkan təmin etdiyini qeyd etməsi qiymətlər üzərindəki təzyiqi azaldır.

Pauellin çıxışından sonra bankın bu ay faiz dərəcələrini aşağı salacağı ehtimalı daha da güclənib. FED-in dekabrın 18-də keçiriləcək iclasında 78 faiz ehtimalla faizini 0,25 faiz bəndi azaldacağı proqnozlaşdırılır.

OPEC+ İCLASI

İnvestorlar bu gün OPEC+ qrupunun gələn il hasilatı ilə bağlı qərarını gözləyirlər. Dünyanın ən böyük neft istehsalçılarının daxil olduğu OPEC+ qrupunun, gələn ilin birinci rübünün sonuna qədər hasilatın azaldılmasını davam etdirəcəyi gözlənilir.

Bildirilir ki, texniki olaraq Brent neftində 74,45 dollar müqavimət, 70,77 dollar isə dəstək olaraq götürülə bilər.