(®) COP29 çərçivəsində SABAH.HUB İnnovasiya Mərkəzi və Azərbaycan Dövlət Neft Şirkətinin (SOCAR) birgə təşkilatçılığı ilə “Dayanıqlı İnnovasiyalar Çağırışı” mövzusunda beynəlxalq tədbir keçirilib. Bu tədbir iqlim texnologiyaları və təmiz texnologiyaların inkişafını dəstəkləmək, innovativ həllər vasitəsilə qlobal problemlərə yanaşma təqdim etmək məqsədini daşıyıb.

Tədbirə dünyanın müxtəlif ölkələrindən 300-dən çox startap layihəsi müraciət edib və seçilən ən yaxşı komandalar COP29 çərçivəsində keçirilən tədbirdə iştirak etmək hüququ qazanıb. Final mərhələsində 10 startap layihəsi təqdim olunub.

Tədbirdə Azərbaycan Dövlət Neft Şirkətinin prezidenti Rövşən Nəcəf çıxış edərək şirkətin uzunmüddətli korporativ strategiyası çərçivəsində rəqəmsallaşma, innovasiya, enerji keçidi və dekarbonizasiya sahələrində həyata keçirilən strateji təşəbbüslərdən bəhs edib. O, ekoloji problemlərin həlli istiqamətində startapların yaratdığı innovativ həllərin vacib rolunu xüsusi vurğulayıb.

SABAH.HUB İnnovasiya Mərkəzinin baş icraçı direktoru Rəhim Bayramlı iştirakçılara tədbirin məqsədi və finala çıxmış startap layihələri haqqında ətraflı məlumat verib. SABAH.fund-ın həmtəsisçi baş partnyoru Abbas Kazmi müxtəlif ölkələrdə maliyyələşdirilən startaplar, onların təqdim etdiyi innovativ yeniliklər və əldə olunan nəticələr barədə çıxış edib.

Tədbirdə təqdim olunan layihələr beynəlxalq investorlar və tədbir iştirakçıları tərəfindən qiymətləndirilib. Nəticədə üç startap qalib müəyyən olunaraq investisiya əldə etmək şansı qazanıb:

- Sirius

- Lumian

- BERKM

Bu tədbir Azərbaycan və qlobal tərəfdaşların davamlı inkişaf istiqamətində birgə səylərini və iqlim texnologiyaları sahəsində innovativ həllərin inkişafına verdiyi dəstəyi bir daha nümayiş etdirdi.

Qeyd edək ki, SABAH.HUB İnnovasiya Mərkəzi iki ildən artıq fəaliyyəti ərzində 300-dən çox startapın inkişafına dəstək göstərmiş və minlərlə insanı innovasiya ekosistemi haqqında maarifləndirmişdir. Mərkəz ümumilikdə 5 milyon AZN məbləğində şəbəkəsində olan startapların investisiya almasına dəstək olmuşdur.

SABAH.HUB-un fəaliyyəti və yeniliklərdən xəbərdar olmaq üçün sabahhub.com veb-saytına keçid edin.