"Amazon" çoxdan gözlənilən aşağı qiymətli məhsul mağazası "Haul" ilə bazara yeni nəfəs gətirməyə çalışır. Xüsusilə qiymət yönümlü gənc istehlakçıları cəlb etməyi hədəfləyən "Amazon", "Haul" ilə populyar e-ticarət platforması "Temu"ya birbaşa rəqib olaraq istifadəyə verilir.

Marja.az-ın məlumatına görə, Çərşənbə günü elan edilən "Amazon Haul", 20 dollardan aşağı olan əlverişli məhsul çeşidi ilə seçilir. Mağaza 1,29 dollarlıq sırğadan 7,99 dollarlıq qadın qamaşlarına qədər geniş çeşiddə məhsullar təqdim edir. Bundan əlavə, Amazon 50 dollar və 75 dollardan yuxarı olan sifarişlərə müxtəlif endirimlər təklif edir; 25 dollar və ya daha çox sifarişlər üçün pulsuz çatdırılma variantı var. Bununla belə, sifarişlərin çatdırılma müddəti ən azı bir həftəlik uzun bir gözləmə müddətini əhatə edə bilər.

"Amazon"un "Prime" üzvlük proqramından fərqli olaraq, "Amazon Haul" platforması "Prime" istifadəçilərinə xüsusi imtiyazlar təklif etmir. "Beta", yəni sınaq mərhələsində olduğu bildirilən "Amazon Haul", yalnız "Amazon"un mobil internet saytı və tətbiqi vasitəsilə istifadə edilə bilər. Platforma moda, aksesuar, ev, gözəllik və elektronika kateqoriyalarında məhsullar təklif edərək geniş alış-veriş auditoriyasına çatmağı hədəfləyir. "Amazon Haul"un görünüşü digər Amazon vitrinlərindən fərqli olaraq dizayn edilmişdir. Platformada emojilər və neon rənglər kimi gənc istifadəçilərin diqqətini çəkəcək çoxlu elementlər var, “Crazy Low” kimi bölmələr də diqqəti cəlb edir. O, həmçinin istifadəçiləri “İndi dayanma! 5% endirim üçün 10.04 dollar əlavə edin” kimi bildirişlərlə təşviq edilir.

Bu strategiya "Temu", "TikTok Shop" və sürətli moda nəhəngi "Shein" kimi rəqiblərin tətbiq etdiyi üsullara bənzəyir, bu da istifadəçini alış-verişini tez xərcləməyə və tamamlamağa təşviq edir. Uzun müddətdir ki, müəyyən bir məhsul və ya markaya fokuslanan və daha səmərəli alış-veriş təcrübələri təqdim edən "Amazon", indi də ucuz məhsullar təqdim edərək gəncləri hədəf alan yeni modeli ilə diqqət çəkir.  "Amazon" "Temu"nun ABŞ-da geniş istehlakçı kütləsini cəlb edərək əldə etdiyi sürətli uğurdan ilhamlanıb. 2022-ci ildə ABŞ bazarına daxil olan və qısa müddətdə milyardlarla dollar gəlir əldə edərək ən populyar alış-veriş tətbiqləri arasında yerini alan "Temu", ultra aşağı qiymətləri ilə xüsusilə gənc istehlakçılar arasında qısa zamanda məşhurlaşdıb.

"Amazon"un ucuz məhsullar təklif etmək məqsədinə uyğun olaraq çinli satıcılarla əlaqə saxladığı və bu təşəbbüsün aylardır planlaşdırıldığı məlumdur.