"GP Cotton Holdings"in şirkətlərindən biri olan "GiLTEX" MMC "Amfori BSCI" sertifikatını əldə edib.

Şirkətin yaydığı məlumaat görə, İsveçrənin SGS şirkəti tərəfindən keçirilən audit zamanı şirkət "A" dərəcəsi ilə qiymətləndirilib.

"Amfori BSCI" sertifikatının tələbləri H&M, Adidas, IKEA, Marks & Spencer və Amazon kimi dünya səviyyəli brendlər tərəfindən qəbul edilmiş standartdır. "GiLTEX" də bu sertifikata layiq görülən Azərbaycanın ilk tekstil şirkəti kimi qlobal təşkilatlar arasında öz yerini alıb.

Sözügedən sertifikat GiLTEX-in beynəlxalq bazarlarda sosial məsuliyyətli və təchizat zəncirində ədalətli iş şəraiti olan bir təşkilat kimi tanınmasına imkan yaradaraq, şirkətin uzunmüddətli əlaqələr qurmasına və ixrac potensialını artırmasına kömək edəcək.

"COP29 tərəfdaşlığı və Amfori BSCI sertifikatı, dayanıqlılıq fəaliyyətimizin davamıdır. Belə ki, biz uzun müddətdir strateji məqsədlərimizdən biri olan dayanıqlılıq istiqamətində önəmli addımlar atırıq. Bunlara misal olaraq, istehsalatda təbiətə zərər verməyən kimyəvi maddələrdən istifadə edilməsi, tullantı sularının təmizlənməsi və şirkətin nəqliyyat vasitələrində karbon emissiyalarına nəzarət olunması kimi tədbirləri sadalaya bilərəm", - GiLTEX MMC-nin Baş direktoru Kamran Aqasi nailiyyətlə bağlı deyib. 

2003-cü ildə Avropa Xarici Ticarət Assosiasiyası tərəfindən yaradılan Amfori BSCI dünyanın ən tanınmış sosial audit proqramlarından biridir və şirkətlərə insanların rifahını yaxşılaşdırmaq, təbii resurslardan məsuliyyətlə istifadə etmək və açıq ticarəti təşviq etmək istiqamətində dəstək verir. Bu standartlar Beynəlxalq Əmək Təşkilatı (ILO) və BMT-nin İnsan Hüquqları Nizamnaməsi kimi beynəlxalq tənzimləmələrə əsaslanır.

"GiLTEX "MMC Azərbaycanda pambıq və tekstil istehsalı ilə məşğul olan GP Cotton Holdings-in bir hissəsidir. "GiLTEX"-  iplik, toxuculuq, boya, geyim və tibbi maska fabriklərindən ibarətdir. Şirkət hər il 18 milyon metr parça, 1800 ton trikotaj, 1000 ton dəsmal, 250,000 uniforma və 1 milyon yataq dəsti istehsal edə bilir. İstehsalatda əsasən "GP Cotton Holdings" şirkətinə daxil olan, pambıq istehsalı üzrə ixtisaslaşmış "MKT İstehsalat Kommersiya" MMC-in istehsal etdiyi yerli pambıqdan istifadə olunur. Fabriklər Belçika, Almaniya, Yaponiya və Türkiyədən gətirilmiş müasir avadanlıqlarla təchiz edilmişdir. 

"GP Cotton Holdings" Azərbaycanın ən böyük pambıq və tekstil istehsalçısıdır. Bu şirkətlər qrupu pambıq tədarük zəncirində pambığın yetişdirilməsi və yığılmasından tutmuş, müxtəlif çeşidli geyimlərin emalı və istehsalına qədər bütün mərhələləri əhatə edir. "GP Cotton" qrupa daxil olan GiLTEX və MKT vasitəsilə 5 000-dən çox insan üçün məşğulluq imkanı yaradır, həmçinin 10 000 fermer və aqronom komandası ilə sıx əməkdaşlıq edir. Birlikdə bu iki şirkət pambıqdan hazır məhsula kimi bütün istehsal prosesini həyata keçirdir.  "GiLTEX" köynək, dəsmal, forma və yataq dəstləri kimi hazır tekstil məhsullarının istehsalı üzrə ixtisaslaşıb. MKT kənd təsərrüfatı əməliyyatlarını nəzarət edir və fermerlər və aqronom komandası ilə sıx əməkdaşlıq edir.