(®) Aparıcı korporativ maliyyə institutu “PAŞA Bank” regionun ən böyük innovasiya tədbiri olan “İNMerge” sammitində iştirak edir.

"PASHA Holding"in təşkilatçılığı ilə keçirilən bu tədbir dünyanın aparıcı texnologiya şirkətlərini, bu sahənin liderlərini, startapları və innovatorları bir araya gətirir. Beynəlxalq sammit rəqəmsal ekosistemin inkişafına töhfə vermək, eləcə də innovasiya ekosisteminin bütün iştirakçıları arasında fikir və təcrübə mübadiləsi aparmaq və faydalı əməkdaşlıq qurmaq üçün mükəmməl bir platformaya çevirilib.

Bu il sammitdə “PAŞA Bank” Əlavə Dəyər Xidmətlərinə (Value-Added Services, VAS) həsr olunmuş vertikalın sponsorudur.

Əlavə Dəyər Xidmətləri dünyada geniş istifadə edilən qeyri-maliyyə xidmətləridir. Onlar şirkətin və ya bankın əsas məhsul və xidmətlərini tamamlayır. Bu istiqamət, istifadəçi təcrübəsini artıraraq və biznes sahiblərinə əlavə rəqabət üstünlüyü verərək, əsas məhsul və xidmətlərin dəyərini yüksəldir. Əlavə Dəyər Xidmətləri gündəlik tələbat malları, telekom, bankçılıq və digər sahələrdə fəal şəkildə istifadə olunur.

“PAŞA Bank”, Azərbaycandakı biznes sahiblərinə Əlavə Dəyər Xidmətlərinin üstünlüklərini tanıtmaq və yerli bazarda məlumatlılığı artırmaq üçün “Nestle”, “KOOP Ventures”, “SupplierPlus”, “International Dgpays Group” və bir sıra qlobal şirkətləri təmsil edən aparıcı beynəlxalq ekspertləri sammitə dəvət edib.

Sammit zamanı, mütəxəssislər bu istiqamətin inkişaf perspektivləri, Azərbaycan bazarında istifadəsi və konkret nümunələri müzakirə edəcək və real sektorun nümayəndələrinin suallarını cavablandıracaqlar.

Etibarlı maliyyə tərəfdaşı olaraq, “PAŞA Bank”, korporativ sektoru və Əlavə Dəyər Xidmətləri seqmentini inkişaf etdirmək, eləcə də Azərbaycanın iqtisadiyyatının dayanıqlı inkişafını təmin etmək məqsədilə layihələrin və ideyaların həyata keçirilməsini davam etdirməyi planlaşdırır.