"Bu gün Naxçıvanda fəaliyyətdə olan sahibkarların böyük əksəriyyətini KOB subyektləri təşkil edir. KOB subyektləri əsasən ticarət, kənd təsərrürfatı, tikinti, emal, logistika, sənaye, turizm, ictimai iaşə, nəqliyyat və digər sahələrdə fəaliyyət göstərirlər".

Bu sözləri Naxçıvanda keçirilən “KOB FEST” sərgi-satış yarmarkasında Naxçıvan Muxtar Respublikanın iqtisadiyyat nazirinin müavini, nazir vəzifələrini müvəqqəti icra edən Abbas İsmayılov deyib.

Nazir müavini bildirib ki, 1 oktyabr 2024-cü il tarixə muxtar respublikada 19729 mikro, 309 kiçik və 91 orta sahibkarlıq subyekti olmaqla, ümumilikdə 20129 aktiv KOB subyekti fəaliyyət göstərir ki, bu da ilin əvvəli ilə müqayisədə 57,3 faiz, o cümlədən mikro 59,0 faiz, kiçik 4,0 faiz və orta sahibkarlıq subyekti isə 3,4 faiz çoxdur.

Naxçıvanda KOB subyektlərinə ayrılan kreditlərin həcmi artıb

Abbas İsmayılov qeyd edib ki, Naxçıvanda maliyyə dəstəyindən faydalananların əksəriyyəti mikro, kiçik və orta sahibkarlıq subyektləri olub. Cari ilin 9 ayı ərzində bank və kredit təşkilatları tərəfindən KOB subyektlərinə verilən kreditin 7,8 faizi Azərbaycan Respublikasının və Naxçıvan Muxtar Respublikasının Sahibkarlığın İnkişafı Fondlarının vəsaitləri hesabına təmin edilib.

“Naxçıvan Muxtar Respublikasının Sahibkarlığın İnkişafı Fondu tərəfindən verilən güzəştli kreditlərin layihə sayı üzrə 92 faizi, kreditin məbləği üzrə isə 27,7 faizi Kiçik və Orta Sahibkarlıq subyektlərinin payına düşüb”,  - deyə Abbas İsmayılov əlavə edib.

Naxçıvanda KOB subyektlərinə göstərilən xidmət sayı artıb

İqtisadiyyat nazirinin müavini, nazir vəzifələrini müvəqqəti icra edən Abbas İsmayılov əlavə edib ki, 2024-cü ilin 9 ayında biznesə dəstək məqsədilə Naxçıvan, Babək, Şərur və Ordubad şəhərlərində yeni yaradılan Vergi ödəyicilərinə xidmət mərkəzləri tərəfindən 41500-dən çox xidmət göstərilib ki, bunun 91 faizi KOB subyektlərinin payına düşür. Mərkəzlərdə göstərilən xidmətlərdən məmnunluq səviyyəsi 98 faiz təşkil edir.

Naxçıvanda verilən lisenziyaların 97,4 faizi KOB subyektlərinin payına düşüb

Abbas İsmayılov deyib ki, iqtisadiyyatın müxtəlif sahələrində yeni KOB subyektlərinin yaranması və mövcud KOB-ların fəaliyyətinin genişlənməsi, özəlləşdirmə proseslərində yaxından iştirak etməsi daim stimullaşdırılır. Cari ilin 9 ayında özəlləşdirilən dövlət əmlaklarının 93,8 faizi KOB subyektləri tərəfindən həyata keçirilib, verilən lisenziyaların 97,4 faizi KOB subyektlərinin payına düşüb.