(®) Azərbaycan Sement İstehsalçıları Assosiasiyasına üzv olan “Norm” ASC, qurumun sement və beton sənayesində CO2 emissiyalarının azaldılmasını nəzərdə tutan “Xalis Sıfır Sürətləndirici” (Net Zero Accelerator) təşəbbüsünə qoşulub.

Şirkət assosiasiyanın 6-7 may tarixlərində təşkil etdiyi seminarlarda iştirak edərək, dayanıqlı inkişafla bağlı paylaşılan təcrübələrə və iqlim fəaliyyətinə yönəlmiş geniş müzakirələrdə yer alıb. 6 may tarixində “Norm” ASC assosiasiyanın üzvü kimi Avropa Sement Tədqiqatları Akademiyası (ECRA) ilə Anlaşma Memorandumunu da imzalayıb.

Bu tərəfdaşlıq sement və beton sənayesində dayanıqlı inkişafı dəstəkləmək və inşaat sahəsində bütün dəyər zənciri boyunca CO2 emissiyalarını azaltmaq üçün beynəlxalq təcrübədən və yerli biliklərdən istifadə etməklə, eləcə də qanunvericilik və tənzimləmələrə nail olmaqla, Azərbaycanın sement sənayesi üçün “Xalis Sıfır Yol Xəritəsi” hazırlamaq məqsədi daşıyır.

Sement sənayesinin karbonsuz və dayanıqlı gələcəyinə doğru istiqamətlənən bu təşəbbüs Norm üçün böyük əhəmiyyət kəsb edir və şirkətin gələcəyə baxışını əks etdirir. Layihə boyunca Norm ətraf mühit və iqlimlə bağlı strategiyaları təşviq etmək və həyata keçirmək üçün dövlət qurumları, qeyri-hökumət təşkilatları və sənaye tərəfdaşları da daxil olmaqla, müxtəlif maraqlı tərəflərlə sıx işləyəcək.

Qeyd edək ki, “Norm” ASC məsuliyyətli fəaliyyət öhdəliyi götürüb və şirkətin strategiyasında ətraf mühitin qorunmasına və dairəvi iqtisadiyyatın tətbiqinə önəmli yer verilir. Ekoloji sement həlləri ilə daha təmiz gələcəyə töhfə vermək üçün Norm Sement zavodunda təbii ehtiyatlardan qənaətlə istifadə olunur. Bu məqsədilə, xammal istehsalında tullantılardan və alternativ yanacaqdan istifadə edilir, eləcə də tullantıların təkrar emalı həyata keçirilir.

“Norm” ASC 10-dan çox ölkədə enerji, telekommunikasiya, yüksək texnologiyalar və tikinti sahələrində fəaliyyət göstərən beynəlxalq şirkətlər qrupu olan NEQSOL Holding-in tərkibinə daxildir.