İnvestorları, biznes liderlərini və hökumət nümayəndələrini yeni investisiya imkanlarını müəyyən etmək, böyüməyə təkan vermək üçün birləşdirən yeni platforma olan “Investopia” İtaliyanın Milan şəhərində  “Investopia Europe 2024” tədbirini təşkil edib. Tədbirdə qlobal şirkətlərin nümayəndələri, nüfuzlu iş adamları bir sıra dövlətlərin nazirləri iştirak edərək günümüzün ən aktual çağırışları haqqında fikirlərini bölüşüblər. O cümlədən, forumda İtaliyanın, Birləşmiş Ərəb Əmirliklərinin, Maltanın iqtisadiyyat nazirləri çıxış ediblər.

Tədbirin xüsusi tərəfdaşlarından biri də “Fernando & Rafael” beynəlxalq şirkəti olub. Qeyd edək ki, bu şirkət azərbaycanlı memar, “Era Design” şirkətinin təsisçisi Rafael Abbasov və İtaliyanın tanınmış memarı Fernando Mosca tərəfindən Azərbaycanda yaradılıb. 

Tədbirə “Fernando & Rafael” beynəlxalq şirkətinin təsisçisi Rafael Abbasov da qatılıb.

“Investopia Europe 2024” tədbiri zamanı xüsusi tərəfdaş olaraq “Fernando & Rafael” şirkətinin video-çarxı nümayiş olunub. Dövlət rəsmilərinin və biznes nümayəndələrinin də izlədiyi videoda Azərbaycan və İtaliya bayraqları da yer alıb.  

Rafael Abbasov deyib: ““Investopia Europe 2024” tədbiri Avropada təşkil olunan ən nüfuzlu forumlardan biridir. Tədbirdə 700-dən artıq nazirlər, sahibkarlar, menecerlər, investorlar və jurnalistlər iştirak edirdi. Belə bir böyük bir forumda Azərbaycandan təmsil olunaraq bayrağımızın da yer aldığı video-çarxın nümayiş olunmasını təşkil etməkdən qürur duyuram. Hesab edirəm ki, hər bir iş adamı öz imkanları daxilində ölkəmizi təbliğ etməli, Azərbaycandakı iş imkanları barədə investorlara məlumat verməlidir. Həmçinin, “Fernando & Rafael” olaraq “Investopia Europe 2024” tədbirində iştirak etməklə yeni biznes imkanları da kəşf etdik”.

Rafael Abbasov əlavə edib ki, "Fernando & Rafael" Memarlıq və Dizayn şirkəti ölkələr arasında olan tarixi dostluğun, memarlıq sahəsində uğurlu əməkdaşlığın bariz nümunəsidir. Məqsəd İtaliya memarlığının zəngin təcrübəsini Azərbaycanda və digər ölkələrdə reallaşdırdığımız layihələrdə uğurla tətbiq etməkdir.

“Investopia Europe 2024” tədbirindən bir gün öncə qala gecəsi təşkil olunub. "Fernando & Rafael" şirkətinin həmtəsisçiləri və əməkdaşları “Investopia”nın yaradıcısı Giovanni Bozzetti tərəfindən dəvət alaraq qala gecəsində iştirak ediblər. Qala gecəsində İtaliyanın və Birləşmiş Ərəb Əmirliklərinin iqtisadiyyat nazirləri də iştirak ediblər. Onlar "Fernando & Rafael" şirkətinin əməkdaşları ilə də görüşərək şəkil çəkdiriblər.