Azərbaycan Auditorlar Palatasının üç sabiq əməkdaşının cinayət işi üzrə məhkəmə baxışı başlayıb.

Bu gün Bakı Ağır Cinayətlər Məhkəməsində hakim Elnur Nuriyevin sədrliyi keçirilən iclasda ittiham aktı elan olunub.

İttiham aktında deyilir ki, 2018-ci ildən başlayaraq maliyyə hesablamaları, maliyyə uçotları, siğorta ödənişləri, vergi ödənişləri, mal-materialların siyahıllaşdırılması zamanı vəzifə səlahiyyətlərindən sui-istifadə edərək ödəniş cədvəllərində, illik hesabatlarda öz qohumları adına onların xəbəri olmadan "Azərbaycan Beynəlxalq Bankı"nda kart hesabı açılıb və həmin karta pul köçürülmələri edilib.

Daha sonra həmin kartlara köçürülən ümumilikdə 717 min 311 manat məbləğ nağdlaşdırma yolu ilə mənimsənilib.

İttiham aktına münasibət bildirən təqsirləndirilənlər - Fəridə Novruzova və Gövhər Əhmədova ittiham edildikləri maddələr üzrə özlərini qismən təqsirli biliblər.

Digər təqsirləndirilən Vəli Rəhimov isə bu maddələr üzrə özünü təqsirli bilməyib. O, sadəcə, öz işində ciddi səhlənkarlığa yol verdiyini bildirib.

Təqsirləndirilən Gövhər Əhmədova çıxışı zamanı öz vəzifəsinə ciddi yanaşmadığını və bu iş üzrə əmrləri Vəli Rəhimovdan aldığını deyib.

Təqsirləndirilən Fəridə Novruzova ehtiyacı olduğu üçün bunu etdiyini və bu barədə Gövhər Əhmədovaya dediyini bildirib.

Daha sonra təqsirləndirilən Vəli Rəhimovun vəkili vəsatətlə çıxış edib. O, ittiham aktında mənimsənilən pulun hansı bankların bankomatlarından, hansı saatda, hansı ünvanda, kim tərəfindən çıxarıldığının əks olunmadığını və bu barədə banka müraciət edilməsi barədə vəsatətlə çıxış edib.

Təqsirləndirilən Gövhər Əhmədova vəsatətlə bağlı hakimin kartlara məbləğlərin necə yüklənməsi barədə ünvanladığı sualı cavablandırıb. O, övladlarının adına olan kartlara məbləğlərin internet üzərindən köçürüldüyünü deyib.

Məhkəmə vəsatəti təmin edib.

Prosesi fevralın 23-də davam etdiriləcək.

Qeyd edək ki, təqsirləndirilən şəxslər Auditorlar Palatasının Maliyyə təminatı və xarici əlaqələr idarəsinin rəisi Vəli Rəhimov, həmin idarənin maliyyəçi-mühasibi Gövhər Əhmədova və Maliyyə və təşkilati-texniki təminat idarəsinin mühasibi Fəridə Novruzovadır.

Təqsirləndirilən şəxslər Cinayət Məcəlləsinin 179.4-cü (Mənimsəmə və ya israf etmə), 308.2-ci (Vəzifə səlahiyyətlərindən sui-istifadə) və 313-cü (Vəzifə saxtakarlığı) maddələri ilə ittiham edilir.

İş üzrə zərərçəkmiş şəxs kimi Azərbaycan Respublikası Auditorlar Palatası tanınıb.

© APA