Venesiya Bələdiyyə Şurasının 2023-cü ilin sentyabrında qəbul etdiyi "gündəlik ziyarətçilərdən giriş haqqının tutulması" ilə bağlı qərarının icrası üçün növbəi addım atılıb. Qərar şəhərdə turist sıxlığına nəzarət etmək üçün qəbul edilib.

Marja.az İtaliya mətbuatında yer alan xəbələrə istinadən xəbər verir ki, Venesiyaya bir günlük ziyarət üçün gələn turistlərin şəhərə 5 avroluq giriş haqqını əvvəlcədən ödəmələrinə və rezervasiya etmələrinə imkan verən rəqəmsal internet portalı istifadəyə verilib.

Belə ki, bu il yaz-yay aylarında şəhərə bir günlük səfər etməyi planlaşdıran turistlər, əgər səfərləri bələdiyyə tərəfindən “məşğul günlər” kimi müəyyən edilən 29 fərqli gündən birinə düşərsə, giriş haqqını ödəyərək rezervasiya edə bilərlər. Portal "Contributo di Accesso a Venezia" (Venesiyaya giriş haqqı) adlanır.

50-300 AVRO CƏRİMƏ

Bu əməliyyat müqabilində gündəlik ziyarətçilərin smartfonlarına keçid sənədi olan QR kodu göndəriləcək və bu QR kodun şəhərdə təsadüfi yoxlamalar zamanı göstərilməsi lazım gələcək. Giriş haqqını ödəməyənlər yerli hakimiyyət orqanları tərəfindən aşkar edilərsə, giriş pulundan əlavə 50-300 avro arasında inzibati cərimə də ödəməli olacaqlar.

Venesiya Bələdiyyəsinin hüdudları daxilindəki otellərdə qalanlar, Venesiyanın yerləşdiyi Veneto bölgəsində yaşayanlar, 14 yaşından kiçik uşaqlar, qayğıya ehtiyacı olanlar, idman yarışlarında iştirak edənlər, səyahət edən orta məktəb şagirdləri, təhlükəsizlik qüvvələri yanğınsöndürmə briqadaları isə giriş haqqını ödəməkdən azaddırlar.

Şəhər Şurasının qərarı ilə bu il məşğul olacağı gözlənilən və bəzi bayram günlərini də əhatə edən fərqli 29 gün ərzində ödənişli giriş sınaqdan keçiriləcək. Bu çərçivədə giriş ödənişi ilk dəfə 25-30 aprel tarixləri arasında tətbiq olunacaq.

Bildirilir ki, giriş ödənişi tətbiq edilməsində məqsəd müəyyən dövrlərdə sıxlığın qarşısını almaqdır.

Venesiya Bələdiyyə Şurasının 2023-cü ilin sentyabrında giriş rüsumunun tətbiqinə dair qərarını dəstəkləyənlər olsa da, bu qərara qarşı  çıxanlar çox olub.

Kanalları ilə məşhur olan Venesiya hər il milyonlarla turisti qəbul edir.