20 Yanvarda Ağ Evə girəcək  45-ci Prezident  Donald Trumpın dünən axşam ABŞ-ın ən böyük avtomobil istehsalçısı General Motors-un Meksikadakı istehsal fəaliyyətlərini tənqid edərək  "Ya ABŞ-da istehsal et, ya da böyük bir sərhəd vergisi ödə" ifadəsini işlədib. Trump-ın "tweeti"ndən sonra Ford, Meksikada planlaşdırdığı 1,6 milyard dollarlıq zavod investisiya qoyuluşunu ləğv edib.

 
Ford-un İcraçı Direktoru Mark Fields, keçirdiyi mətbuat konfransında, Meksikada  1,6 milyard dollara başa gələcək zavodun tikilməsi planının ləğv edildiyin açıqlayıb. Fields, sözügedən plan yerinə, Fordun baş ofisinin də yerləşdiyi ABŞ-ın Miçiqan ştatında şirkətin 700 milyon dollarlıq investisiya edəcəyini və bunun 700 nəfərlik yeni iş yeri yaradacağını bildirib.
 

Fordun "Fokus" adlı avtomobil modelini Meksikada istehsal etməyə davam edəcəyini qeyd edən Fields, şirkətin "Mustang" və "Lincoln Continental" modellərilə elektrik avtomobillərini Miçiqanda istehsal ediləcəyi məlumatını verib.

Açıqlamanın ardından, Fordun səhminin qiyməti Nyu-York birjasında 3,3 faiz dəyər qazanıb, Meksika pesosu isə ABŞ dollarına qarşı 1 faizə qədər ucuzlaşıb.

TRUMP BƏYANAT VERMİŞDİ

 
 ABŞ Prezidenti seçilən Donald Trump, seçki kampaniyası zamanı, Fordun və digər böyük Amerikalı şirkətlərin ölkə xaricində istehsal etməsini sərt bir dillə tənqid etmiş və bu şirkətlərin ABŞ-a geri dönərək ölkə daxilində məşğulluq yaratması lazım olduğunu vurğulamışdı.

 
Mütəxəssislər, Trumpın iqtisadi siyasətinə işarə edərək, sərbəst bazara etməyə planlaşdırdığı müdaxilələrin uzun perspektivdə Amerika iqtisadiyyatına və qlobal bazarları mənfi təsir göstərəcəyi barədə xəbərdarlıq edirlər.

 
 Digər tərəfdən, 20-nci əsr əvvəlindən etibarən ABŞ-ın avtomobil mərkəzi kimi tanınan Miçiqan əyalətində, 1970-ci illərdən etibarən Amerikalı şirkətlərin istehsallarını ucuz işçi qüvvəsi səbəbindən Meksika, Cənubi Amerika və Asiyaya daşıması ilə işsizlik artmağa başlamışdı. Miçiqan ştatının ən böyük şəhəri olan Detroyt, 2013-də iflasını açıqlamışdı.