Rusiya 2023-cü ildə Türkiyəyə əsas təbii qaz və neft tədarükçüsü mövqeyini qoruyub.

Marja.az Türkiyə Enerji Bazarının Tənzimlənməsi Xidmətinin məlumatlarına istinadən xəbər verir  ki, təkcə 2023-cü ilin oktyabrında Türkiyənin neft idxalının 49,93%-i Rusiya Federasiyasından olub. Bir il əvvəl Türkiyə neftin 40,74%-ni Rusiyadan idxal edirdi.

Rusiya Türkiyəyə əsas təbii qaz ixracatçısıdır. Belə ki, 2023-cü ilin oktyabrında Rusiya qazının Türkiyənin idxalında payı 59,14% təşkil edib. Rusiya Federasiyasının 2023-cü ildə təbii qaz üçün  Türkiyənin ödəmələrini təxirə salması “iqtisadi problemlərin həllində Ankaraya sakitləşdirici təsir göstərib”. Bundan əvvəl yerli KİV Rusiya neft və neft məhsullarının idxalının artması sayəsində Türkiyənin 2023-cü ildə təxminən 2 milyard dollara qənaət etdiyini yazmışdı.

Rusiya tərəfindən tikilən Türkiyənin ilk atom elektrik stansiyası olan Akkuyu layihəsi ikitərəfli əməkdaşlığın simvollarından biridir. Plana əsasən, stansiya 2024-cü ildə elektrik enerjisi istehsal etməyə başlamalıdır. 

Türkiyə Turizm Nazirliyinin rəsmi məlumatına görə, 2023-cü ilin 11 ayı ərzində respublikaya Rusiyadan 6,9 milyon turist səfər edib. Bu göstəriciyə görə Rusiya Federasiyası digər ölkələri üstələyib.

Bundan əlavə, ötən ilin yekunlarına görə, Türkiyə şirkətlərinin Rusiya ərazisində həyata keçirdiyi müqavilə layihələrinin sayına görə birinci yeri tutub. Türkiyə Podratçılar Birliyinin rəhbəri Erdal Erenpin sözlərinə görə, 2023-cü ildə Türkiyə podrat sektorunun Rusiya Federasiyasında həyata keçirdiyi layihələrin həcmi 4,6 milyard dollar təşkil edib.Ümumilikdə, əvvəllər həyata keçirilən layihələr də nəzərə alınmaqla bu rəqəm 20 milyard dollara çatır. 

Türkiyənin Rusiya ilə həm iqtisadiyyat, həm də siyasət sahəsində fəal əməkdaşlığı 2023-cü ildə Ankaranın Qərblə qeyri-sabit münasibətləri fonunda davam edib.