Qlobal fond bazarları ABŞ-da açıqlanacaq inflyasiya məlumatları və həftə ərzində açıqlanacaq faiz qərarları öncəsi yüksəlir.

Marja xəbər verir ki, həftənin ilk əməliyyat gününü 0,4 faiz artımla tamamlayan S&P 500 indeksi fyuçersləri yüksəlişini davam etdirir.

Reuters agentliyi, Sədr Xi Jinping və digər yüksək səviyyəli liderlərin Çinin 2024-cü il üçün iqtisadi artım hədəfini və planlarını müzakirə etmək üçün illik Mərkəzi İqtisadi İş Konfransına başladığı barədə xəbər yaymasından sonra bütün gözlər gələn il nə qədər stimullar ola biləcəyinə yönəlib.

Asiyada, Çinin sabit qalan CSI 300 göstəricisi istisna olmaqla, indekslər müsbət zonadadır.

Bazar ertəsi günü 0,15 faiz bahalaşan Bloomberg Dollar İndeksi bu səhər 0,12 faiz azalaraq 1242-yə düşüb.

ABŞ inflyasiyası diqqət mərkəzindədir

ABŞ-da noyabr ayı inflyasiya məlumatları FED-in 2023-cü ilin son faiz qərarından əvvəl açıqlanacaq. Bloomberg sorğusuna görə, noyabrda istehlak qiymətləri indeksinin (inflyasiya göstəricisi) oktyabr ayı ilə müqayisədə dəyişmədiyi və illik müqayisədə isə 3,2 faiz artımdan 3,1 faiz artıma endiyi təxmin edilir.

Baza inflyasiyada aylıq 0,3 faiz və illik 4 faiz artımın açıqlanacağı gözlənilir.

Bloomberg Economics-in ABŞ-ın baş iqtisadçısı Anna Vonqun fikrincə, gözlənildiyi kimi İstehlak Qiymətləri İndeksinin elanı FED-ə faiz endirimlərini nəzərdən keçirməyə imkan verəcək.

Vonq,  iqtisadi "soyumanın" nəticəsində inflyasiyanın sürətinin düşməkdə davam edəcəyini və bunun da FED-in 2024-cü ilin birinci rübündən başlayaraq faiz dərəcələrini azaltmasına səbəb olacağını bildirib.

“Biz 2024-cü ilin birinci yarısında əsas istehlakçı inflyasiyanın 3 faizdən bir qədər aşağı olacağını gözləyirik”, - deyə Vonq əlavə edib: "Əmək bazarı daha tez soyumasa, inflyasiyanın bu səviyyədə qalacağı ehtimal edilir".

Digər tərəfdən, dünən FED-in Nyu York İdarəsinin dünən dərc etdiyi sorğu nəticəsinə görə, ABŞ istehlakçılarının qısamüddətli inflyasiya gözləntiləri noyabr ayında 2021-ci ilin aprelindən bəri ən aşağı səviyyəyə düşüb. Enerji qiymətlərindəki azalmanın gözləntilərin düşməsinə səbəb olduğuna diqqət çəkən Vonq, "İqtisadi fəaliyyətdəki aşağı istiqamətli risklər və inflyasiya risklərinin azalması - bu vəziyyət FED-in faiz endirimlərini düşünməsinə zəmin yaradacaq" deyib.