Bu gün Bakıda "PAŞA Holding" tərəfindən təşkil olunan “InMerge İnnovasiya Sammiti” öz işinə başlayacaq. “InMerge" regionun ən böyük innovasiya sammitidir.

Marja.az xəbər verir ki, sammit 30 noyabr - 1 dekabr 2023-cü il tarixlərində Bakı Konqres Mərkəzində keçiriləcək.

Sammit telekommunikasiya, maliyyə texnologiyaları, rəqəmsallaşma və elektron ticarət kimi sahələri özündə birləşdirir ki, bu mövzularda çıxışlar, panellər və  təqdimatlar baş tutacaq. Sammitin birinci günü yalnız spikerlərin çıxışları ilə kifayətlənməyəcək, həmçinin startaplar öz ideyalarını iştirakçılara təqdim edəcək və dünyaca məşhur ekspertlərin rəhbərliyində təlimlər baş tutacaq.

Tədbirin ikinci günündə qonaqlar elektron ticarət və rəqəmsallaşma sahələri ilə bağlı mövzuları müzakirə edəcək, həmçinin təlimlərə və startap sessiyalarına qoşulmaq şansı əldə edəcəklər. Sammitin ikinci günündə də startaplar öz ideyalarını investorlara və tədbirə qatılan hər kəsə təqdim edəcəklər.

Sammitdə "Apple" şirkətinin həmtəsisçisi Steve Wozniakın, "FutureThink" şirkətinin direktoru Lisa Bodellin, "Shazam"ın yaradıcısı Chris Bartonun, "Tesla"nın həmtəsisçisi JB Straubel-ın, Azərbaycan Prezidentinin köməkçisi,  Prezidenti Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümovun, Rəqəmsal inkişaf və nəqliyyat naziri Rəşad Nəbiyevin, İqtisadiyyat nazirinin birinci müavini Elnur Əliyevin, Rəqəmsal inkişaf və nəqliyyat nazirinin müavini Fərid Əhmədovun, "PAŞA Holding"in Baş direktoru Cəlal Qasımovun, “Kapital Bank”ın İdarə heyətinin sədri Fərid Hüseynovun, “Bakcell”in Baş direktoru Klaus Muellerin, “Trendyol”un Azərbaycandakı baş meneceri İrem Çağrı Yılandilin, Azərbaycan Mərkəzi Bankının icraçı direktoru Fərid Osmanovun, İnnovasiya və Rəqəmsal İnkişaf Agentliyinin sədri İnarə Vəliyevanın, "Paşa Holding"in Baş direktorunun müavini  Fərid Məmmədovun və s. çıxışları nəzərdə tutulur.

Sammitin birinci günü “Apple” şirkətinin həmtəsisçisi Steve Wozniak-ın təqdimatı ilə start götürəcək. 

“PAŞA Holding” MMC nəinki ölkədə, həm də regionda innovasiyaları artırmaq üçün daim böyük addımlar atır. Bu addımlardan biri də InMerge İnnovasiya Sammitidir.