2023-cü ilin yanvar-sentyabr ayları ərzində statistik vahidlərin (fərdi sahibkarlar istisna olmaqla) sayı 6,5 faiz artaraq 2023-cü il oktyabrın 1-i vəziyyətinə 194 min 631 olmuşdur.

Marja.az Dövlət Statistika Komitəsinin aylıq hesabatına istinadən xəbər verir ki, artım iqtisadiyyatın “Nəqliyyat və anbar təsərrüfatı”, “Su təchizatı; tullantıların təmizlənməsi və emalı”, “Turistlərin yerləşdirilməsi və ictimai iaşə”, “Ticarət; nəqliyyat vasitələrinin təmiri”, “Daşınmaz əmlakla əlaqədar əməliyyatlar”, “İnformasiya və rabitə”, “İstirahət, əyləncə və incəsənət sahəsində fəaliyyət” və “Peşə, elmi və texniki fəaliyyət” sahələrində nəzərəçarpacaq dərəcədə olmuşdur.

“Ticarət; nəqliyyat vasitələrinin təmiri”, “Digər sahələrdə xidmətlərin göstərilməsi”, “Tikinti”, “Peşə, elmi və texniki fəaliyyət” və “Kənd təsərrüfatı, meşə təsərrüfatı və balıqçılıq” sahələrindəki statistik vahidlərin xüsusi çəkisi daha yüksək olmuşdur. 

Xüsusi mülkiyyətə aid olan statistik vahidlərin əsas hissəsi “Ticarət; nəqliyyat vasitələrinin təmiri” (32,8%), “Digər sahələrdə xidmətlərin göstərilməsi” (15,3%), “Tikinti” (9,4%), “Peşə, elmi və texniki fəaliyyət” (7,3%), “Kənd təsərrüfatı, meşə təsərrüfatı və balıqçılıq” (6,5%), “Emal sənayesi” (6,0%) və “İnzibati və yardımçı xidmətlərin göstərilməsi” (5,7%) sahələrinin payına düşür.

Reyestrdə qeydiyyatdan keçmiş statistik vahidlərdən tam xarici investisiyalı və birgə müəssisələr əsasən Türkiyə (24,5%), İran (11,2%), Rusiya (7,1%), Böyük Britaniya (4,0%), ABŞ (1,6%) və Almaniya (1,1%) kimi ölkələrin sahibkarları tərəfindən yaradılmışdır.

2023-cü ilin yanvar-sentyabr ayları ərzində ləğv edilmiş statistik vahidlərin 19,1 faizi “Ticarət; nəqliyyat vasitələrinin təmiri”, 15,5 faizi “Digər sahələrdə xidmətlərin göstərilməsi”, 9,8 faizi “Peşə, elmi və texniki fəaliyyət”, 8,4 faizi “Tikinti”, 7,9 faizi “Dövlət idarəetməsi və müdafiə; sosial təminat”, 7,5 faizi “Emal sənayesi”, 5,7 faizi “Nəqliyyat və anbar təsərrüfatı” sahələrinin, qalanları isə digər bölmələrin payına düşür. 

Bu dövrdə yeni yaradılmış statistik vahidlərin 41,8 faizi “Ticarət; nəqliyyat vasitələrinin təmiri”, 8,7 faizi “Peşə, elmi və texniki fəaliyyət”, 6,9 faizi “Emal sənayesi”, 6,5 faizi “Tikinti”, 6,2 faizi “İnzibati və yardımçı xidmətlərin göstərilməsi”, 5,1 faizi “Nəqliyyat və anbar təsərrüfatı” sahələrinin, qalanları isə digər bölmələrin payına düşür.