Azərbaycanın Divi şirkəti Çinin Lenovo şirkətinin logistika tərəfdaşı olub.

Bu barədə Marja.az-a Lenovo şirkətindən bildirilib. 

Qeyd edək ki, Divi Azərbaycanda EPSON, CANON, LENOVO, ACER, NIKON, PIONEER DJ və s. brendlərin distribyutorudur.

Qeyd edilib ki, Lenovo şirkəti Mərkəzi Asiya və Cənubi Qafqazda mövcudluğunu genişləndirir və regionlarda ehtiyat hissələri anbarları şəbəkəsinin açıldığını elan edir.

"Bu, Lenovo-ya bazarda iştirakını gücləndirməyə və region ölkələrində müştəri xidmətlərinin keyfiyyətini yüksəltməyə imkan verəcək",- məlumatda bildirilir.

“Öz ehtiyat hissələri anbarımızın açılması bizə Mərkəzi Asiya və Azərbaycan bazarında mövqeyimizi möhkəmləndirməyə imkan verəcək. Bundan əlavə, bu, bizə müştərilərimizə xidmət keyfiyyətini artırmaqla yanaşı, regionda mövcud olan peşəkar xidmətlər portfelini genişləndirmək və zəmanətli avadanlıqların bərpa müddəti ilə xidmət təklif etmək imkanı verəcək. Məqsədimiz regionda və dünyada İKT infrastrukturu sahəsində kompleks həllərin ən böyük etibarlı tədarükçüsü olmaqdır”, - deyə "Lenovo İnfrastructure Solutions Group"un (ISG) Şərqi Avropa və Mərkəzi Asiya üzrə baş direktoru Andrey Kutukov şərh edib.

Şirkətin 3 anbarı Özbəkistanda (Daşkənd), Azərbaycanda (Bakı) və Qazaxıstanda (Almatı) açılıb. Lenovo anbarlarında bu ölkələrdən olan müştərilərinə xidmət və zəmanət xidməti üzrə müqavilə öhdəliklərini yerinə yetirmək üçün ehtiyat hissələri saxlayacaqdır. 

Yerli anbarların olması lazımi malların birbaşa anbardan müştəriyə göndərilməsinə imkan verəcək. Üstəlik, anbarların belə təşkili hətta kiçik yaşayış məntəqələrini də lazımi ehtiyat hissələri ilə təmin etməyə və regionun digər ölkələrini təchiz etmək üçün paylama mərkəzlərinə çevrilməyə imkan verəcək.

Yeni ehtiyat hissələri anbarlarının açılması Lenovo-nun regionda şirkətin mövqelərini gücləndirmək strategiyasının bir hissəsidir. 

Daşkənd və Almatıda yeni Lenovo anbarları UPS (United Parcel Service) beynəlxalq logistika şirkətinin bazasında fəaliyyətə başlayıb. Bakıda isə DiVi şirkəti Lenovo-nun logistika tərəfdaşı olub. Qeyd edilib ki, bu iş formatı Lenovo məhsullarının daşınması və logistikası baxımından bu tərəfdaşlarla uzun və müsbət əməkdaşlıq təcrübəsi ilə bağlıdır.

Anbarlar 24/7 fəaliyyət göstərəcək.