Azərbaycan Respublikasının Qida Təhlükəsizliyi Agentliyi (AQTA) cari ilin may ayının 1-dən etibarən qablaşdırılmış içməli sularla bağlı nəzarət tədbirləri aparıb.

Marja.az AQTA-ya istinadən xəbər verir ki, artıq 3 müəssisənin fəaliyyəti dayandırılıb.

Fəaliyyəti dayandırılan müəssisələr fiziki şəxs Ələsgərov Xəqani, “Qafqaz Aqua” MMC və “AM Trading” MMC şirkətlərinə məxsusdur. Müvafiq olaraq istehsal edilən “Muğanlı”, “Qafqaz Aqua” və “Qornaya” məhsullarında mikrobioloji göstəricilərdə uyğunsuzluq aşkar edilib. Bununla əlaqədar olaraq müəssisələrin fəaliyyəti dayandırılıb, uyğunsuzluq aşkar edilmiş partiyanın ticarət şəbəkəsindən geri çağırılması ilə bağlı icrası məcburi göstərişlər verilib.

"AzNar" QSC-nin istehsal etdiyi "Aria" məhsulunda da mikrobioloji göstəricilərdə uyğunsuzluq aşkar edilib. Belə ki, suyun mənbəyi İsmayıllı rayonu, "Nar Bulaq" artezian quyusu olduğu halda, üzərində dağ şəkli göstərilərək dağ suyu təəssüratı yaradır. Uyğunsuzluq aşkar edilmiş məhsul partiyasının ticarət şəbəkəsindən geri çağırılması ilə bağlı icrası məcburi göstərişlər verilib. Yeni qablaşdırmada dağ şəkli çıxarılıb.

Həmçinin Fiziki şəxs Dadaşov Azər oğluna məxsus müəssisənin fəaliyyəti "Bir Dama Su" məhsulunun üzərində etiket məlumatları mövcud olmadığına görə dayandırılıb. Nöqsanların aradan qaldırılması ilə bağlı vaxt verilib.

Həmçinin müəyyən edilib ki, qablaşdırılmış su məhsulunun üzərində  "Çemp Su" MMC suyun mənbəyi "mərkəzləşdirilmiş su xəttindən təmizlənmiş içməli su" olduğu halda, üzərində "müalicəvi" xarakterli məlumatlar və "Böyük Qafqaz sıra dağlarının təbii bulaqlarından ekoloji təmiz su" qeyd edib, 

Fiziki şəxs Zeynalova Sevda Nofəl qızı "Abşirin Su" məhsulunun üzərində suyun mənbəyi quyu suyu olduğu halda, üzərində "təbii içməli su" qeyd edib, 

"İkar-Qrup" MMC şirkəti  "Elmas" məhsulunun üzərində suyun mənbəyi "Abşeron rayonu, Zirə kəndi, artezian suyu" olduğu halda, üzərində "mineral süfrə suyu" qeyd edib, "Ada Su" məhsulunun üzərində suyun mənbəyi “Abşeron rayonu, Zirə kəndi, artezian suyu” olduğu halda, üzərində "təbii qazsız içməli su" qeyd edib, “Gülüm” məhsulunun üzərində isə suyun mənbəyi “Abşeron rayonu, Zirə kəndi, artezian suyu” olduğu halda, üzərində "mineral su" qeyd edib, "Sizlik Su" məhsulunun isə mənbəyi qeyd olunmayıb.

“Çuxuryurd” məhsulunun üəzrində "təbii müalicəvi mineral süfrə suyu", "Mor-Mor Turşsu" üzərində "müalicəvi" xarakterli məlumatlar, həmçinin adında "mineral müalicəvi  süfrə suyu", "Çaldaş"məhsulunun üzərində isə "müalicəvi" xarakterli məlumatlar, həmçinin adında "müalicəvi süfrə suyu" qeyd olunub. 

Həmçinin "Gülazar" suyunun mənbəyinin  "Göygöl-Gəncə magistral su kəməri" olduğu halda, üzərində dağ şəkli göstərilərək dağ suyu təəssüratı yaradıb və suyun mənbəyi qeyd edilməyib.

“Vita 1000” suyun mənbəyi "Oğuz-Qəbələ-Bakı su kəməri" olduğu halda, üzərində "Böyük Qafqaz sıra dağları" və "təbii mineral süfrə suyu" qeyd olunsa da, istehsal prosesi zamanı müvafiq filterdən keçirildiyi müşahidə olunub.

"Murovdağ" suyun mənbəyi "Göygöl-Gəncə magistral su kəməri" olduğu halda, üzərində dağ şəkli göstərilərək dağ suyu təəssüratı yaradır və suyun mənbəyi qeyd edilməyib.

"Ozon Su" suyun mənbəyi  mərkəzləşdirilmiş su xəttindən götürülən su olsa da, məhsulun üzərində suyun mənbəyi "Böyük Qafqaz sıra dağları" qeyd olunub.

"Zəhra" suyun mənbəyi "Göygöl-Gəncə magistral su kəməri" olduğu halda, üzərində "bulaq suyu" ifadəsi qeyd olunub.

"İpək Su" MMC şirkətinə məxsus "İpək Su" suyun mənbəyi "Xaçmaz rayonu artezian suyu" olduğu halda, üzərində "bulaq suyu" qeyd edilib.

Fiziki şəxs Hüseynov Ədalət Alcəfər oğluna məxsus "İpək Su" suyun mənbəyi "Xaçmaz rayonu artezian suyu" olduğu halda, üzərində "bulaq suyu" qeyd edilib.

"Mehri Su", "Fərab Su", "İnci", "Kuzə","Saf Su" və "Araz Su" məhsullarının üzərində suyun mənbəyi qeyd olunmayıb.

Aşkarlanmış nöqsanlarla bağlı hər bir sahibkar barəsində protokol tərtib edilib. Həmin məhsulların emalı və satışı dayandırılıb, qanunvericiliyin tələblərinə uyğun olmayan etiketlərin istifadəsi qadağan olunub və həmin etiketlər məhv edilib. Eyni zamanda, məhsulların etiketlənməsinin qanunvericiliyin tələblərinə uyğunlaşdırılması ilə bağlı sahibkarlara icrası məcburi göstərişlər verilib.

Qeyd edilib ki, bir sıra qida subyektləri tərəfindən qanunvericiliyin tələblərinə uyğun hazırlanmış yeni etiketlərlə məhsulların emalına başlanılıb.

Mikrobioloji göstəricilərində uyğunsuzluq aşkar edilən 4 müəssisə və həmin müəssisələrdə emal olunan məhsullar, həmçinin görülən tədbirlərlə aşağıdakı cədvəl vasitəsilə tanış ola bilərsiniz: 

Cədvəl 1.

Etiket məlumatlarında uyğunsuzluqlar aşkarlanan 18 müəssisə və həmin müəssisələrdə emal olunan məhsullar, həmçinin görülən tədbirlərlə aşağıdakı cədvəl vasitəsilə tanış ola bilərsiniz: 

Cədvəl 2.