"Azercell Telekom" MMC şirkəti 2022-ci ili 128 milyon 839 min manat xalis mənfəət ilə başa vurub. Şirkət 2021-ci ili 121 milyon 175 min manat xalis mənfəət ilə bağlamışdı.

Beləliklə, "Azercell Telekom"un xalis mənfəəti 2022-ci ildə 2021-ci illə müqayisədə 7 milyon 664 min manat və ya 6,3% artıb. Ötən il şirkəti bölüşdürülməmiş mənfəəti 116 milyon 325 min manat aratarq 790 milyon 317 min manata yüksəlib.

Marja.az "Azercell Telekom" MMC-nin 31 dekabr 2022-ci ildə bitən il üçün Konsolidə edilmiş maliyyə hesabatlarına istinadən xəbər verir ki, 2021-ci ildə Azercell-in rabitə xidmətlərindən gəlirləri (satış) 492 milyon 91 min manat ikən, 2022-ci ildə 531 milyon 822 min manata yüksəlib. Ötən il Şirkətin əsas əməliyyat gəlirləri 39 milyon 731 min manat və ya 8,1% artıb.

2022-ci ildə "Azercell Telekom"un cəmi əməliyat gəlirləri (satış, maliyyə və digər gəlirlər) 535 milyon 30 min manat, cəmi əməliyyat xərcləri 363 milyon 624 min manat, gəlirlər xərcləri üstələdiyindən əməliyyat mənfəəti 171 milyon 406 min manat təşkil edib. Şirkət ötən il 42 milyon 567 min manat mənfəət vergisi ödəyib.

Müqayisə üçün qeyd edək ki, 2021-ci ildə Azercell-in cəmi əməliyyat gəlirləri 492 milyon 871 min manat, cəmi əməliyyat xərcləri 344 milyon 568 min manat, əməliyyat mənfəəti 148 milyon 303 min manat, ödədiyi mənfəət vergisi 27 milyon 128 min manat təşkil etmişdi. 

AKTİVLƏRİ 1 MİLYARD MANATI KEÇİB

31 dekabr 2022-ci il tarixində "Azercell Telekom" 1 milyard 20 milyon 182 min manat cəmi aktivlərə malik olub. 2021-ci ilin sonunda şirkətin cəmi aktivləri 910 milyon 61 min manata çatmışdı. Ötən il Azercell-i cəmi aktivləri 110 milyon 121 min manat artıb.

Azərbaycan Respublikasının Rəqəmsal İnkişaf və Nəqliyyat Nazirliyinə tabe olan "AzInTelecom” MMC və Niderland qanunvericiliyinə əsasən yaradılmış “Fintur Holdings B.V.” şirkəti arasında 5 mart 2018-ci il tarixində Türkiyə Cümhuriyyətində təsis edilmiş “Azertel Telekomünikasyon Yatırım Dış Ticaret A.Ş.” (“Azertel”) şirkətinin 51,3% səhmlərinin alınması barədə müqavilə imzalanmışdı. “Azertel” Azərbaycan Respublikasında mobil xidmətlər operatoru olan “Azercell Telecom” Məhdud Məsuliyyətli Cəmiyyətin yeganə təsisçisidir.