Dövlətə məxsus "Azərişıq" ASC 2022-ci ili 56 milyon 257 min manat xalis mənfəət ilə başa vurub. Şirkət 2021-ci ili 12 milyon 666 min manat xlias mənfəət ilə bağlamışdı.

Beləliklə, "Azərişıq" ASC-nin xalis mənfəəti 2022-ci ildə 2021-ci illə müqayisədə 4,4 dəfə artıb. Xalis mənfəətin artması ilə əlaqədar olaraq şirkətin yığılmış zərəri 369 milyon 594 min manatdan 313 milyon 337 min manata düşüb. 

Xatırladaq ki, "Azərişıq" şirkətinin xalis mənfəəti 2021-ci ildə 2020-ci illə müqayisədə 4,4 dəfə arrtmışdı. ASC 2020-ci ili 2 milyon 866 min manat xalis mənfəət ilə bağlamışdı.

SATIŞDAN GƏLİRLƏRİ 1,5 MİLYARD MANATDAN ÇOX OLUB

Marja.az şirkətin audit olunmuş maliyyə hesabatlarına istinadən xəbər verir ki, "Azərişıq" şirkətinin satışdan gəlirləri 2021-ci ildə 1 milyard 325 milyon 6 min manat ikən, 2022-ci ildə 1 milyard 540 milyon 473 min manat təşkil edib (215 milyon 467 min manat artıb). Satışın maya dəyəri isə 1 milyard 162 milyon 279 min manatdan 1 milyard 318 milyon 841 min manata qalxıb (156 milyon 562 min manat artıb). Şirkətin əsas gəlir mənbəyi elektrik enerjisi satışı və quraşdırma xidmətləridir.  

AKTİVLƏRİ 3 MİLYARD MANATA YAXINLAŞIB

31 Dekabr 2022-ci il tarixində "Azərişıq" ASC 2 milyard 915 milyon 645 min manat cəmi aktivlərə malik olub. Şirkət 2021-ci ilin sonunda 2 milyard 654 milyon 168 min manat cəmi aktivlərə malik idi. Ötən il şirkətin cəmi aktivləri 261 milyon 477 min manat artıb. 

"Azərişıq" ASC “Bakıelektrikşəbəkə” Səhmdar Cəmiyyətinin yaradılması və idarəetməyə verilməsi haqqında” Azərbaycan Respublikası Prezidentinin 14 iyun 2000-ci il tarixli 441 nömrəli Sərəncamına əsasən dövlətə məxsus müəssisə kimi təsis edilmişdir. Şirkət Azərbaycan Respublikasında özəlləşdirmə proqramının tərkib hissəsi olan “Bakıelektrikşəbəkə” İstehsalat Birliyinin özəlləşdirməyə hazırlanması haqqında” Azərbaycan Respublikası Prezidentinin 1999-cu il 8 noyabr tarixli, 253 nömrəli sərəncamına uyğun olaraq açıq səhmdar cəmiyyət kimi özəlləşdirilmişdir. 7 noyabr 2001-ci il tarixində şirkətin idarəetməsi “Barmek Holding A.S.” şirkətinə verilmişdir. Daha sonra 2006-cı ildə Azərbaycan Respublikasının hökuməti “Barmek Holding A.S.” şirkəti ilə müqaviləni dayandırmış və 11 avqust 2006-cı ildə Azərbaycan Respublikasının İqtisadi İnkişaf Nazirliyi 414 nömrəli sərəncamla “Barmek Holding A.S.” şirkətindən aktivləri Şirkətə geri qaytarmağı tələb etmişdir. 10 fevral 2015-ci ildə Azərbaycan Respublikası Prezidentinin “Azərişıq ASC” haqqında Sərəncamı ilə “Bakıelektrikşəbəkə” ASC “Azərişıq” ASC adlandırılmışdır. 

2020-ci il yanvarın 7-dən “Azərişıq” ASC-nin sədri Vüqar Əhmədovdur.