Ötən həftə Amerikada, Avrozonda və Almaniyada proqnozların çox altında açıqlanan ÜDM göstəricisi, eləcə də, Almaniyada geriləyən inflyasiya göstəriciləri fonunda EUR/USD və GBP/USD məzənnələri həftəni müvafiq olaraq 1.10$ və 1.25$ hədlərinin üzərində bağladı.

Lakin cümə günü Amerikada mart ayı üçün şəxsi gəlir 0.3%, şəxsi istehlak xərcləri isə 0.1% artımla açıqlandı. Məlumatların ən əhəmiyyətli maddəsi olan istehlak xərclərinin baza indeksi (Core PCE) mart ayında 0.3% artıb. ABŞ-da inflyasiyanın yayıldığını göstərən məlumatlar həftənin son ticarət günü dollara bir qədər dəstək oldu.

Bu həftə FED-in faiz qərarı, Amerikada açıqlanacaq əmək bazarına dair statistik göstəricilər, xüsusilə də “NFP” DXY-da tendensiyanın gedişinə ciddi təsir edə bilər.

EUR

Bu həftə Avropa Mərkəzi Bankının faiz qərarı, Avrozonada açıqlanacaq İstehlak Qiymətləri İndeksi, Almaniyada və Avrozonada açıqlanacaq Sənaye və Xidmət Sektorlarında Biznes Aktivliyi İndeksləri EUR/USD məzənəsində tendensiyanın formalaşmasında əhəmiyyətli rol oynaya bilər. Təhlillərə əsasən “ayılar” EUR/USD məzənnəsində qiymətləri 1.10$ həddinin altında saxlaya bilsələr, eniş tendensiyası 1.08$-a kimi davam edə bilər.

GBP

Ötən həftəni 1.25$ səviyyəsinin üzərində tamamlayan GBP/USD məzənnəsində trendin necə davam edəcəyinə bu həftə İngiltərədə dərc olunacaq Sənaye və Xidmət Sektorlarında Biznes Aktivliyi İndeksi göstəriciləri ciddi təsir edə bilər. 

GOLD

Cümə günü FED-in inflyasiya göstəricisi olaraq qəbul etdiyi Fərdi İstehlak Xərcləri və ərzaq və enerji məhsulları istisna olmaqla Baza Şəxsi İstehlak Xərcləri Qiymət İndeksinin proqnozların üzərində açıqlanması fonunda qızılın unsiya üzrə qiyməti ucuzlaşaraq həftəni 1983$ səviyyəsində başa vurdu.

Təhlillərə əsasən bu həftə FED-in və AMB-nin faiz qərarları, Amerikada və Avrozonada açıqlanacaq İstehlak Qiymətləri İndeksi göstəriciləri, həmçinin Amerikada dərc olunacaq əmək bazarı xüsusilə də NFP, eləcə də Amerika, Avrozona və İngiltərədə dərc olunacaq Sənaye və Xidmət Sektorlarında Biznes Aktivliyi İndeksləri valyuta bazarlarında aktivliyin artmasına səbəb ola bilər. Bu isə qiymətli metalın qiymətlərində də ciddi dalğalanmalar yarada bilər.

Məlumat "İnvest-AZ" investisiya şirkətinin analitikləri tərəfindən hazırlanıb.