İş adamı, “ELLLIS CATERING” MMC-nin təsisçisi Cəmil Tağıyev 2021-ci ildə icarəyə götürdüyü obyektin qanunusuz olaraq başqa şəxsin istifadəsinə verildiyini bildirir.

C.Tağıyev 2020-ci ildə şirkət qurduğunu və bir il sonra şəhərin mərkəzində obyekt icarəyə götürdüyünü bildirib.

“2021-ci ildə Bakı şəhəri, Zərifə Əliyeva küçəsi 12 ünvanında yerləşən Şahmarova Hicran Ağacavad qızına məxsus olan qeyri-yaşayış sahəsini müqavilə əsasında 4 il müddətinə icarəyə götürdüm. Həmin obyektdə restoran açmaq məqsədilə oranı əsaslı təmir etdim və müasir avadanlıqlarla təmin etdim. Ümumilikdə təqribən 100 min manata yaxın vəsait sərmayə qoymuşam ki, uzunmüddətli prespektivdə həm qoyulmuş pulu çıxardım, həm də müəyyən gəlir əldə edim”.

C.Tağıyev bildirib ki, H.Şahmarova bağladığı müqavilənin müddəti 4 illik olsa da, obyekt ona təhvil verildikdən 6 ay sonra həmin yer sahibi tərəfindən başqa şəxslərə icarəyə verilib və onu obyektdən zorla çıxarıblar: ““ELLLIS CATERING” MMC-yə məxsus olan əşyaları çölə atıb işçilərimi qovublar. Hadisə nəticəsində hətta mənə məxsus mobil telefonumu da sındırıblar. Hadisə ilə bağlı polisə müraciət etsəm də, bunun mülki xarakterli məsələ olduğu üçün məhkəməyə müraciət etməli olduğumu bildirdilər. Bundan sonra məhkəməyə müraciət etdim. 2 il davam edən məhkəmə prosesinin sonunda Bakı Kommersiya Məhkəməsinin 2-2(113)-1491/2022 nömrəli, 27.05.2022-ci il tarixli qətnaməsinə əsasən iddiam təmin edildi və məhkəmə cavabdehin üzərinə öhdəlik qoydu ki, mübahisə predmeti olan obyekti mənim istifadəmə qaytarsın və bununla bağlı heç bir maneələr yaratmasın”.

Şikayətçi Bakı Kommersiya Məhkəməsinin qəbul etdiyi qətnamənin icrasının Bakı şəhəri Səbail Rayon İcra Şöbəsinə (icra məmuru Səbuhi Əhmədov) həvalə edildiyini, lakin qurumun icranı həyata keçirmədiyini deyib: “Həmin qətnamə bu günə qədər sadəcə olaraq bir kağız parçası kimi qalıb, məhkəmə qərarı bu günədək icra edilməyib. Dəfələrlə edilən müraciətlərə baxmayaraq Səbail Rayon İcra Şöbəsi, başda rəis Anar Qocayev olmaqla həmin icra sənədinin icrası üçün heç bir tədbir görməyib. Məhkəmənin göstərişinin yerinə yetirilməməsi “ELLLIS CATERING” MMC-nin ədalətli məhkəmə araşdırması hüququnun, o cümlədən iqtisadi fəaliyyət azadlığının kobud surətdə pozulmasına gətirib çıxarıb. Həmçinin Hicran Şahmarova qətnamənin icrasından qərəzli olaraq yayınır. Əgər sahibkar investisiya yatırıb fəaliyyət göstərir, dövlət büdcəsinə vergi ödəyirsə, lakin dövlət sahibkarın haqlı mənafeyini müdafiə edə bilmirsə, o zaman bu məhkəmə institutu nəyə lazımdır?! Nəyə lazımdır notarial qaydada müqavilə bağlamaq, nəyə lazımdır mediasiyaya, sonra məhkəməyə müraciət etmək onlar üçün rüsumlar ödəmək?!”

Şikayətdə adı çəkilən Hicran Şahmarovanın ailəsindən bildirilib ki, Cəmil Tağıyevin iddiaları həqiqəti əks etdirmir: "Biz Bakı Kommeriya Məhkəməsinin qərarından şikayət vermişik. Əslində onlar bizə 300 min manatadək ziyan vurub. Həmin şəxs obyekti icarəyə götürəndən sonra özünə şəriklər götürüb və onlardan pul alıb. İndi pulu qaytara bilmədiyi üçün bizə qarşı iddialar irəli sürür".

© Qafqazinfo