Zəlzələlər zamanı yaşanan rabitə problemlərinə görə, Türkiyədə GSM şirkətləri (mobil operatorlar) barəsində cinayət işi açılaraq araşdırmalara başlanılıb.

Marja xəbər verir ki, fəlakət bölgəsində rabitənin kəsilməsi ictimaiyyətin böyük reaksiyasına səbəb olub.

Türkiyənin Nəqliyyat və İnfrastruktur nazirinin müavini Ömər Fatih Sayan 14 fevralda 3 GSM şirkətinə (Turkcell, Türk Telekom və Vodafone) qarşı istintaq başladığını bildirib. Sayan bildirib ki, araşdırmalar nəticəsində həmin şirkətlər barəsində lazımi tədbirlər görüləcək.

İnformasiya Texnologiyaları və Rabitə İdarəsi (BTK) də istintaqın başladığını təsdiqləyib.

Şirkətlərin investisiyaları azalsa da, fəlakətlərin idarə olunmasında fiasko yaşanıb.

Zəlzələnin ən kritik ilk saatlarında rabitənin kəsilməsi yardım və axtarış-xilasetmə işlərində böyük fasilələrə səbəb olub. Zəlzələ riski ilə bağlı lazımi araşdırma aparılmayan binalarda quraşdırılmış baza stansiyalarının əksəriyyəti binaların uçması səbəbindən yararsız hala düşüb, sonradan gətirilən mobil stansiyalar enerji təchizatında yaşanan problemlər səbəbindən lazımi gücə çata bilməyib.

Rabitənin kəsilməsi GSM şirkətlərini ictimaiyyətin gündəminə gətirib, şirkətlərin maliyyə nəticələri investisiyaların real olaraq azaldığını göstərib.

“Turkcell” və “Türk Telekom”un maliyyə nəticələrinə görə, şirkətlərin investisiya xərclərinin son illərdə artması inflyasiyadan çox geridə qalıb.

"Türk Telekom"un maliyyə nəticələrinə görə, şirkətin 2022-ci ildə investisiya xərcləri 14 milyard TL olaraq qeyd edilib. 2021-ci ildə şirkətin əsaslı xərcləri 8,7 milyard TL olub. Bu məlumatlar nəzərə alındıqda, şirkətin 2022-ci ildə investisiya xərclərinin 61,4% artırdığı görülür. Bu artım 2022-ci ildə qeydə alınan 64,27 faiz illik inflyasiyadan aşağıdır. Yəni 2022-ci ildə şirkətin investisiya xərcləri real ifadədə azalıb.

Oxşar mənzərə "Türk Telekom"un 2021-ci ildəki investisiya performansında da müşahidə olunub. 2021-ci ildə şirkətin investisiya xərclərinin artımı 36,08 faiz inflyasiyadan geri qalaraq 24,6 faiz təşkil edib.

Şirkətin əvvəlki illərdəki fəaliyyətinə nəzər saldıqda 2017 və 2018-ci illərdə investisiya xərclərinin nominal ifadədə azaldığı müşahidə olunub. 2017-ci ildə şirkətin investisiya xərcləri 9,5 faiz; 2018-ci ildə 3,8 faiz azalıb.