Yanvarın 16-dan 20-dək İsveçrənin Davos şəhərində “Parçalanmış dünyada əməkdaşlıq” devizi altında Dünya İqtisadi Forumu (WEF - World Economic Forum) keçiriləcək.

Ötən əsrin 70-ci illərindən Davos qışda dünya liderlərini, iri şirkətlərin top menecerlərini, siyasi və ictimai xadimləri qəbul edir.

2021-ci ildə WEF-in iclası koronavirus pandemiyası səbəbindən onlayn keçirilib. 2022-ci ildə Forum COVID ilə əlaqədar olaraq yanvar ayında deyil, may ayında keçirilib.

Marja xəbər verir ki, təşkilatçılara görə, bu il Davosa rekord sayda iştirakçı - 2,7 mindən çox insan gələcək. Forumun proqramına əsasən, yanvarın 17-də Avropa Komissiyasının sədri Ursula fon der Leyen və Çin Baş nazirinin müavini Liu Henin çıxışları gözlənilir.

Yanvarın 18-i BMT-nin baş katibi Antonio Quterreş və Almaniya kansleri Olaf Şolz çıxış edəcəklər. Cənubi Koreya prezidenti Yoon Seok-yeol ertəsi gün çıxış edəcək.

Davosa Polşa Prezidenti Anjey Duda, NATO-nun baş katibi Yens Stoltenberq, Serbiya prezidenti Aleksandr Vuçiç, ABŞ prezidentinin iqlim məsələləri üzrə elçisi Con Kerri, Beynəlxalq Valyuta Fondunun rəhbəri Kristalina Georgiyeva, Ümumdünya Səhiyyə Təşkilatının baş direktoru Tedros Adhanom Qebreyesus, ÜTT-nin baş direktoru Nqozi Okonjo-İveala şəxsən Forumda iştirak edəcəklər.

Rusiya nümayəndə heyəti Davos forumunda iştirak etməyəcək. Ötən ilin yazında WEF Ukraynadakı hadisələrə görə sanksiyalara məruz qalan insanlarla əlaqəni dayandırıb və Rusiya Federasiyasının nümayəndələri ilə münasibətləri dondurub.

Davosda keçirilən Dünya İqtisadi Forumu dövlət-özəl sektor əməkdaşlığı üzrə beynəlxalq təşkilatdır. Forumun təsisçisi və daimi rəhbəri Cenevrə Universitetinin professoru Klaus Şvabdır. Dünya İqtisadi Forumunun builki proqramı - dünyanın ən aktual problemlərinin həlli üçün dövlət və özəl sektorları tərəfdaşlığa, dünya liderlərini enerji, iqlim və ticarət sahələrində birgə işləməyə çağırır.