OPEC+ dünən Vyanada keçirilən toplantısında pandemiyadan sonra ən böyük hasilatın azaldılması barədə qərar qəbul edib. Bu qərardan sonra Goldman Sachs-dan Morgan Stanley-ə qədər bir çox qurum neft qiymətləri ilə bağlı proqnozlarını yuxarıya doğru dəyişib.

Marja.az xəbər verir ki, OPEC+ Nazirlər Komitəsinin iclasında hasilatın gündəlik 2 milyon barel azaldılması qərara alınıb. Bu, OPEC+ın 2020-ci ildən bəri ən böyük hasilatı azaltmasıdır. Qərardan sonra bəzi qurumlar da neft bazarı ilə bağlı proqnozlarını yeniləyiblər.

Morgan Stanley-in analitikləri Brent markalı neftin qiymətinin proqnozlardan daha tez 100 dollar/barelə yüksələcəyini gözləyirlər. Bank 2023-cü ilin ilk üç ayı üçün Brent markalı neftin qiyməti proqnozunu 5 dollar artımla 100 dollara çatdırıb. Növbəti 3 rüb üçün proqnoz dəyişməyib.

Goldman Sachs proqnozunu 110 dollara qaldırıb

Goldman Sachs-ın Enerji analitiki Damien Courvalin Bloomberg TV-yə deyib ki, “təchizat tərəfində hazırda bütün proseslər ilin sonuna doğru qiymətlərin yüksələcəyinə işarə edir”, - deyib. Bank Brent markalı neft üçün son rüb proqnozunu 100 dollardan 110 dollara qaldırıb.

UBS Group-un analitikləri neft qiymətlərinin daha da artacağını və qarşıdakı rüblərdə 100 dolları keçəcəyini proqnozlaşdırırlar. OPEC plusun qərarı, Avropanın Rusiyadan qaz idxalına qadağa qoyması ehtimalı kimi amillərin qiymətləri artıracağı qeyd edilir.

ING Group-un əmtəə üzrə strateqi Uorren Peterson OPEC-in bu addımının gələn il balansları əhəmiyyətli dərəcədə dəyişəcəyini bildirib. Ekspert gələn il Brent markalı neftin qiymətinin 97 dollar olacağını proqnozlaşdırıb. O, ABŞ-ın strateji neft ehtiyatlardan daha çox satış edə biləcəyini, lakin onun təsirinin məhdud olacağını söyləyib.

Citigroup-un analitikləri “Hasilatın azaldılması kağız üzərində böyük və effektiv olaraq ixtisar daha az olacaq, çünki OPEC onsuz da öz kvotalarına çata bilir. İqtisadi fəaliyyətə zərər verərsə və neftə tələbat daha da azalarsa, plan əks nəticə verə bilər” deyib.

SPI Asset Management yaxın bir neçə rübdə Brent markalı neftin 100 dolları keçəcəyi ilə bağlı proqnozunu paylaşıb.

Brent markalı neftin qiyməti bu gün 94 dolları keçib.