ABŞ və onun müttəfiqlərinin Rusiya nefti üçün tavan qiymətləri təyin etmək cəhdləri Moskva ilə Qərb arasında dağıdıcı iqtisadi müharibəyə səbəb ola bilər.

Marja xəbər verir ki, belə bir qiymətləndirmə çərşənbə axşamı Amerikanın "The National Interest" jurnalında dərc olunan məqalədə bildirilir.

Materialda bildirilir ki, "Əgər G7 ölkələri qiymət tavanı (qiymətə məhdudiyyət, limit) tətbiq edə bilsələr, bu, neftin qiymətini nisbətən sabit saxlaya bilər və Rusiyanın gəlirlərini məhdudlaşdıra bilər". 

Məqalədə qeyd olunur ki, bu planın həyata keçirilə biləcəyi və nə dərəcədə effektiv olacağı ilə bağlı suallar qalır. Bu suallardan ən mühümü Moskvanın cavabının nə olacağıdır. 

Rusiya daha əvvəl, bu məhdudiyyətləri tətbiq etməyə cəhd edəcək ölkələrə neft tədarükünü dayandırmağa hazır olduğunu bəyan edib.

Müəllif Blez Malli deyir: “Əgər Rusiya neftin qiymətinə qoyulan məhdudiyyətlərə əməl etməsə, bu, Moskva ilə Qərb arasında dağıdıcı iqtisadi  müharibəyə səbəb ola bilər”. 

Onun fikrincə, əgər Rusiya rəhbərliyi dekabr ayına qədər məhdudiyyətlərə əməl edən ölkələrə ixracı dayandırmaq qərarına gəlsə, neft qiymətləri yenidən yüksələcək və bu, qarşıdan gələn Konqresə ara seçkilər ərəfəsində ABŞ prezidenti Co Bayden üçün başağrısı olacaq.

Məqalədə verilən qiymətləndirməyə görə, ABŞ və müttəfiqlərinin planını “praktikada həyata keçirmək çətin ola bilər”. "Həddindən artıq çox tərəfi nəzərə almaq lazımdır və əgər Rusiya və OPEC təslim olmaq istəməsə,  G-7 ölkələri üçün xərclər əhəmiyyətli olacaq", - Malli bildirib. 

O vurğulayıb ki, Vaşinqton və onun müttəfiqləri tərəfindən bu planın həyata keçirilməsi “Səudiyyə Ərəbistanı və digər OPEC ölkələrinin maraqlarına zidd ola bilər”. Qiymət tavanının tətbiqi OPEC-in dünyada neftin qiymətini təyin etmək qabiliyyətinə birbaşa təhlükə yaradır", - materialda deyilir.

“Nəhayət, G7 planının uğuru yəqin ki, Çin və Hindistandan da dəstək tələb edəcək”, - müəllif vurğulayıb. Onun sözlərinə görə, hər iki ölkənin nümayəndələri bununla bağlı heç bir öhdəlik götürməyiblər.

Rusiyanın mövqeyi

Rusiya baş nazirinin müavini Aleksandr Novak sentyabrın 1-də jurnalistlərə bildirib ki, Moskva, Rusiya Federasiyası neftinin qiymətini məhdudlaşdırmağa qərar verən ölkələrə neft və neft məhsullarının tədarükünü dayandıracaq. Baş nazirin müavinini qeyd edib ki, Rusiya “qeyri-bazar şərtləri ilə” işləməyəcək. Eyni zamanda, Novak Rusiya neftinin qiymətinə məhdudiyyətlərin qoyulması təkliflərini “tam absurd” adlandırıb. Bundan əlavə, o, xəbərdarlıq edib ki, söhbət “bütün dünyanın enerji təhlükəsizliyinin təmin edilməsi baxımından ən vacib olan neft sənayesi kimi sənayenin bazar mexanizmlərinə müdaxilədən gedir, bu cür cəhdlər yalnız sabitliyin pozulmasına gətirib çıxaracaq".