2021-ci ilin yekunlarına görə, dünyada qaz istehlakı ilk dəfə olaraq 4 trilyon kubmetri ötüb.

Marja xəbər verir ki, bu barədə Böyük Britaniyanın BP şirkətinin dünya enerjisinə dair statistik icmalında bildirilir. 

Son bir ildə dünya qaz istehlakı 5,3% artaraq 4,038 trilyon kubmetrə çatıb, bu da pandemiyadan əvvəlki göstəriciləri üstələyir. Dünyada qaz hasilatı da artıb və təxminən tələbata bərabər olub - 4,037 trilyon kubmetr. 

Avropada qazın hasilatı və idxalı

Xüsusilə, Avropada təbii qaza tələbat 5,7% artaraq son 10 ildə maksimuma çatıb (571 milyard kubmetrdən bir qədər çox). Regionun qaz hasilatı 1975-ci ildən bəri minimum səviyyəyə düşüb və cəmi 210,4 milyard kubmetr təşkil edib. 

Eyni zamanda, Avropa 2021-ci ildə 341 milyard kubmetr təbii qaz idxal edib (Norveçdən regionun digər ölkələrinə təqribən 113 milyard kubmetr həcmində boru kəməri tədarükü istisna olmaqla). Bunlardan 232,8 mlrd. kubmetri boru kəmərləri ilə (o cümlədən 167 milyard kubmetr Rusiyadan və 37,2 milyard kubmetr Afrikadan), 108,2 mlrd. kubmetri  LNG tədarükü olub. ABŞ (30,8 milyard kubmetr), Qətər (22,5 milyard kubmetr), Rusiya (17,4 milyard kubmetr), Əlcəzair (15,4 milyard kubmetr) və Nigeriya (13 milyard kubmetr) keçən il Avropa ölkələrinə ən çox LNG göndərib.  

Ümumilikdə, Rusiyadan qaz tədarükünün payı (həm boru kəməri, həm də LNG şəklində) Avropada ümumi qaz istehlakının 37%-ni təşkil edib. 

Qlobal LNG təchizatı

Ümumilikdə, 2021-ci ildə qlobal LNG tədarükü 5,6% artaraq 516 milyard kubmetrə çatıb. Bu 2015-ci ildən bəri ən yavaş artım tempidir (2020-ci il istisna olmaqla), ABŞ-ın LNG tədarükü 34 milyard kubmetr artaraq 95 milyard kubmetrə çatıb.

Çin Yaponiyanı keçərək dünyanın ən böyük LNG idxalçısı (109,5 milyard kubmetrə qarşı Yaponiyanın 101,3 milyard kubmetr) olub və 2021-ci ildə qlobal LNG tələbatının artımının təxminən 60%-ni təşkil edib.