ABŞ-ın əsas neft istehsalçılarından biri olan Chevron-un baş direktoru Mayk Virt (Mike Wirth) ABŞ prezidenti Co Baydenin böyük neft şirkətlərinə ünvanladığı tənqidləri rədd edərək, neftin qiymətinin aşağı salınması və təklifin artırılması üçün yanaşma dəyişikliyinə ehtiyac olduğunu bildirib.

Marja xəbər verir ki, Rusiyanın Ukraynaya hücumu ilə daha da ağırlaşan qlobal tələb və təklif balanssızlığının asan həllinin olmadığına diqqət çəkən Virt, bu vəziyyətin siyasi ritorikadan çox düşünülmüş hərəkət və birlikdə işləmək istəyilə həll edilə bilinəcəyini qeyd edib.

“Tariximizdə ən yüksək həcmdə istehsal etdik”

Chevron-un ötən il 143 illik tarixində ən yüksək həcmlərdə neft və qaz hasil etdiyini qeyd edən Virt, bu ilin birinci rübündə ABŞ-dakı neft hasilatlarının ötən ilin eyni rübünə nisbətən 109 min barel artaraq gündəlik 1,2 milyon barrelə çatdığını bildirib.

Məktubunda Chevron-un rəhbəri Virt qeyd edib:

"Bu səylərə baxmayaraq, administrasiyanız əsasən sənayemizi tənqid etməyə və bəzən böhtan atmağa çalışdı. Bu hərəkətlər üzləşdiyimiz problemlərin həllində faydalı deyil və Amerika xalqı buna layiq deyil. Bugünkü geosiyasi vəziyyət bu enerji böhranına səbəb olub. Qiymətləri aşağı salmaq və təchizatı artırmaq üçün yanaşmanı dəyişmək lazımdır. Siz bizim sənayemizi enerji istehsalını artırmağa çağırdınız. Biz razıyıq, gəlin birlikdə işləyək. ABŞ enerji sənayesinin sizin rəhbərliyinizin əməkdaşlığına və dəstəyinə ehtiyacı var. Bu,  ölkəmizin daha böyük enerji təhlükəsizliyi, iqtisadi inkişafı və rifah üçün edilməlidir". 

ABŞ prezidenti Co Bayden isə Chevron-un baş direktoru Wirth-in məktubunu “çox həssas” adlandırıb. "Mən sizin hisslərinizin bu qədər asanlıqla inciyəcəyini bilmirdim",- Bayden qeyd edib. 

Bayden keçən həftə verdiyi açıqlamada neft şirkətlərinin tədarük çatışmazlığından (təklifin az olmasından) istifadə edərək mənfəətlərini artırdıqlarını bildirib.

ExxonMobil, Chevron, BP və Shell kimi şirkətlərə məktub yazan Bayden, artan benzin qiymətlərinə qarşı neft şirkətlərini hasilatı artırmağa çağırıb.