“PAŞA Bank”ın tərəfdaşlığı və Deloitte Azərbaycan şirkətinin təşkilatçılığı ilə keçirilən “Best Managed Companies Azerbaijan 2022” müsabiqəsi başa çatıb.

Müsabiqənin əsas məqsədi yüksək biznes fəallığı ilə fərqlənən yerli özəl şirkətləri qiymətləndirmək və geniş ictimaiyyətə tanıtmaq olub. İştirakçı şirkətlər müstəqil münsiflər heyəti tərəfindən strategiya, insan kapitalının inkişafı, öhdəlik və maliyyə göstəriciləri kimi dörd meyar əsasında qiymətləndirilib. Beləliklə də, METAK, Səba və Veysəloğlu şirkətləri bu müsabiqənin qalibləri seçilib.

“PAŞA Bank”ın idarə heyətinin üzvü Xəyalə Nağıyeva may ayının 26-da keçirilən bağlanış mərasimində çıxış edib.

“Biz, etibarlı maliyyə tərəfdaşı kimi ilk günlərdən öz müştərilərimizi korporativ idarəetmə, maliyyə menecmenti, korporativ sosial məsuliyyət strategiyası, insan kapitalının inkişafı kimi mühüm istiqamətləri inkişaf etdirməyə səsləmişik. “Best Managed Companies” proqramı çərçivəsində qalib şirkətlərin müəyyən olunmasının əsas meyarları da məhz PAŞA Bankın vacib saydığı bu dəyərləri özündə birləşdirir. Bu da porqramı bizim üçün daha da əhəmiyyətli edir. İnanıram ki, iştirakçıların müsabiqə ərzində qazandıqları praktiki tövsiyələr və biliklər onlara öz fəaliyyətlərini daha da genişləndirməyə, mövqelərini möhkəmləndirməyə, beynəlxalq biznes mühitinə inteqrasiya etməyə və yeni işgüzar əlaqələr qurmağa kömək edəcək. Bununla da, müsabiqənin əsas məqsədinə - Azərbaycan sahibkarlığının inkişafına dəstək göstərmək məqsədinə çatmış olacağıq”, - deyə Xəyalə Nağıyeva vurğulayıb.

Deloitte Azərbaycan şirkətinin idarəedici partnyoru Nuran Kərimov tədbirin əhəmiyyətindən danışarkən bildiirb: “Azərbaycanda fəaliyyətimizin 20 illiyində bu möhtəşəm layihəni yerli sahibkarlara dəstək olmaq məqsədilə MDB məkanında ilk dəfə məhz Azərbaycanda başladıq. Bizim üçün bu layihə özəl sektorda çalışan qabaqcıl Azərbaycan şirkətlərinin aşkarlayıb, onların uğurunu cəmiyyətə və beynəlxalq səviyyədə tanıtmaq üçün fürsətdir. Bu layihə sayəsində biz həmçinin Azərbaycan hökumətinin sahibkarlığın inkışafına yönəlmiş səylərinə əlavə dəstək vermiş oluruq. Əminik ki, hər il keçiriləcək bu mötəbər biznes müsabiqəsində daha çox Azərbaycan şirkəti iştirak edib faydalanacaq”.

15 illik fəaliyyəti boyunca ölkə iqtisadiyyatının və sahibkarlığın dayanıqlı inkişafına  töhfə verən “PAŞA Bank” bu istiqamətdəki təşəbbüslərini davam etdirəcək.