Avropa İttifaqı ortamüddətli perspektivdə neft tədarükçüsü kimi Rusiyanı əvəz edə bilməyəcək.

Marja xəbər verir ki, “Lukoyl”un eks-prezidenti Vaqit Ələkbərov bazar günü “Financial Times” qəzetinin saytında dərc olunan müsahibəsində Rusiyaya qarşı neft embarqosunun tətbiqinin hər iki tərəf üçün “mümkün olan ən pis ssenari” olacağını bildirib.

O, Avropa Komissiyasının Rusiya neftindən imtina planlarını şərh edərkən deyib: “Rusiya kimi böyük enerji təchizatçısı üçün hətta ortamüddətli perspektivdə əvəzedici tapmaq mümkün deyil”. Bu, dekarbonizasiya kimi təbii proses deyil və koronavirus pandemiyası zamanı yaranan qısamüddətli istehlak böhranı deyil. Bu, bütün bazar iştirakçıları üçün uzunmüddətli mənfi nəticələrə səbəb olacaq son dərəcə ağır enerji böhranıdır".

Onun sözlərinə görə, Rusiya neftinin tədarükünü başqa ölkələrə yönəltməyə imkan verəcək yeni infrastrukturun qurulmasına illər lazım olacaq: "Rusiya 2020-ci ildə pandemiyanın əvvəlində edildiyi kimi neft hasilatını azaltmalı olacaq, çünki Avropaya göndərilən bütün həcmlərini bir gecədə başqa ölkələrə yönləndirmək mümkün deyil".

"Hərbi münaqişələr tez başa çata bilər, halbuki qlobal enerji konfiqurasiyası onilliklər ərzində bir çox peşəkar nəsillər tərəfindən sərmayələr və gərgin zəhmət hesabına qurulub. Bütün bunları pozmağa və məhv etməyə ehtiyac yoxdur", - "Lukoyl"un keçmiş rəhbəri əlavə edib.

O, qeyd edib ki, Qərb ölkələri Rusiya dövlətinə və biznesinə qarşı sanksiyalar tətbiq etməklə artıq öz mövqelərini sərtləşdiriblər və onları daha da sərtləşdirməyə ehtiyac yoxdur. Ələkbərovun sözlərinə görə, Qərbin sanksiya siyasəti çox vaxt “xaotik, emosional xarakterli” təəssürat yaradır və “siyasi qərarlar qəbul etməyən və siyasi təsir gücü olmayan” insanlara məhdudiyyətlər qoyulur.

Fevralın 24-də Rusiya prezidenti Vladimir Putin qondarma Donbass respublikalarının rəhbərlərinin yardım xahişinə cavab olaraq Ukraynada "xüsusi hərbi əməliyyat" elan edib. Bundan sonra ABŞ, Avropa İttifaqı, Böyük Britaniya, eləcə də bir sıra digər dövlətlər Rusiyanın fiziki və hüquqi şəxslərinə qarşı sanksiyalar tətbiq etdiklərini bəyan ediblər.