Yaponiya Ukraynadakı vəziyyətə və davam edən hərbi əməliyyata görə Rusiyaya qarşı sanksiyaları genişləndirib.

Marja xəbər verir ki, bu barədə cümə günü Yaponiya Xarici İşlər Nazirliyi məlumat yayıb.

Siyahıya daha 25 rusiyalı, o cümlədən VEB.RF-nin rəhbəri İqor Şuvalov, həmçinin Rusiya rəsmilərinin və iş adamlarının qohumları daxildir. Xüsusilə, söhbət Rusiya Federasiyası Prezidentinin mətbuat katibi Dmitri Peskovun (Elizabet və Nikolay) və həyat yoldaşı Tatyana Navkanın övladlarından gedir. Siyahıya Rusiya Federasiyası Təhlükəsizlik Şurasının katibi Nikolay Patruşev və Rusiya Federasiyası Prezidenti Administrasiyası rəhbərinin birinci müavini Sergey Kiriyenkonun qohumları da əlavə edilib. Onlar aktivlərin dondurulması da daxil olmaqla bir sıra məhdudiyyətlərə məruz qalırlar.

Yaponiya həmçinin əlavə ixrac sanksiyaları tətbiq edərək, məhdudiyyətlərə məruz qalan şirkət və təşkilatların siyahısını 49-dan 130-a qədər genişləndirib. Buraya gəmiqayırma şirkətləri, elektronika və avadanlıq istehsalçıları, o cümlədən Amur Gəmiqayırma Zavodu və Rusiya Kosmik Sistemləri daxildir. Martın əvvəlində Rosoboroneksport ASC, Rostec, FSB və Xarici Kəşfiyyat Xidməti və başqaları da bura daxil edilib.

Bundan əlavə, Yaponiya hakimiyyəti  Rusiyaya dəbdəbəli malların ixracına qadağa qoyulduğunu açıqlayıb. Hazırda belə maddələrin siyahısı təsdiqlənməyib. Yaxın vaxtlarda ictimaiyyətə açıqlanacağı gözlənilir.

Yaponiya daha əvvəl Ukrayna ətrafındakı vəziyyətlə əlaqədar Rusiya Federasiyasına qarşı bir neçə sanksiya paketini açıqlayıb. 100-dən çox şəxs, o cümlədən ölkə rəhbərliyinin nümayəndələri, məmurlar və iş adamları fərdi sanksiyalara məruz qalıb. İxrac edilməsi qadağan edilən mal və texnologiyaların siyahısına 300 adda, o cümlədən yarımkeçiricilər, dəniz və aviasiya təhlükəsizliyi üçün avadanlıqlar, telekommunikasiya avadanlıqları, rabitə vasitələri, hərbi təyinatlı məhsullar, o cümlədən silahlar, proqram təminatı, neft emalı avadanlığı daxildir. Bundan əlavə, Yaponiya Otkritie Bank, Novikombank, Sovcombank, VTB, Rossiya Bank, Promsvyazbank və VEB.RF-nin aktivlərini dondurub.