Amerikanın Visa şirkəti Rusiyada işlərini dayandırmaq niyyətində olduğunu açıqlayıb.

Marja xəbər verir ki, bu barədə şirkətin şənbə günü dərc olunmuş press-relizində deyilir.

"Yaxın günlərdə Visa Rusiyadakı müştəriləri və tərəfdaşları ilə birlikdə əməliyyatlarını dayandıracaq. Proses başa çatdıqdan sonra Rusiya Federasiyasında buraxılmış Visa kartları artıq ölkə hüdudlarından kənarda işləməyəcək", - press-relizdə deyilir.

Şirkətin rəhbəri Alfred Kellinin sözlərinə görə, Visa Ukrayna ətrafında yaranmış vəziyyət fonunda müvafiq tədbirlər görür.

Visa daha əvvəl bildirmişdi ki, şirkət, “müvafiq sanksiyalara əməl olunmasını təmin etmək üçün çevik tədbirlər görür və tətbiq oluna biləcək əlavə sanksiyalara əməl etməyə hazırdır”.

Mastercard Rusiyada xidmətlərin göstərilməsini dayandırıb

Amerikanın Mastercard maliyyə korporasiyası Rusiyada xidmətlərin göstərilməsini dayandırıb. Bu barədə şənbə günü şirkətin saytında dərc edilmiş məlumatda deyilir.

Məlumatda vurğulanır ki, şirkət anti-Rusiya sanksiyalarına görə, Rusiyada xidmətlərin göstərilməsini dayandırmaq qərarına gəlib. “Bu tədbir Rusiya bankları tərəfindən buraxılan kartların Mastercard sistemi tərəfindən dəstəklənməyəcəyini nəzərdə tutur”, - məlumatda deyilir.

Bundan əlavə, şirkət ölkədən kənarda buraxılan Mastercard kartlarının Rusiyada işləməyəcəyini vurğulayıb.

Şirkət rəhbərliyi Ukrayna ətrafında yaranmış vəziyyəti nəzərə alaraq müvafiq tədbirlərin görüldüyünü qeyd edib. Eyni zamanda, şirkət vurğulayıb ki, Rusiya Federasiyasındakı tərəfdaşlarla əməkdaşlıq edərək, "uyğun olduqda və qanunla icazə verilən zaman əməliyyatların bərpası üçün işə başlayacaq".

Bundan əvvəl Mastercard Ukrayna ətrafındakı vəziyyətlə əlaqədar tətbiq edilən anti-Rusiya sanksiyalarına görə "bir çox maliyyə institutlarına" öz ödəniş sisteminə çıxışı bloklayıb.

Rusiya Mərkəzi Bankından açıqlama

"Bütün Rusiya banklarının Visa və Mastercard beynəlxalq ödəniş sistemlərinin kartları Rusiya Federasiyasında işləməyə davam edəcək, belə kartlarla əlaqəli hesablardakı müştəri vəsaitləri tam saxlanılır və mövcuddur". Marja xəbər verir ki, bu, Rusiya Mərkəzi Bankının yaydığı məlumatda bildirilir.  

"Rusiya bankları tərəfindən buraxılmış bütün Visa və Mastercard beynəlxalq ödəniş sistemləri kartları Rusiyada istifadə müddəti bitənə qədər aktiv olacaqlar. Onlar üzrə əməliyyatlar ölkə daxilində Milli Ödəniş Kartı Sistemində aparılır və onlara sanksiyalar təsir etmir. Müştərinin belə kartlarla əlaqəli hesablardakı vəsaiti tam olaraq saxlanılır və əlçatandır”, - tənzimləyici bildirib.

Rusiyada bu kartların sahibləri bankomatlarda əməliyyatlar apara, kartlarla ödəniş edə, kartdan karta köçürmələr edə biləcəklər. Eyni zamanda Mərkəzi Bank xəbərdarlıq edib ki, Visa və Mastercard kartları ilə transsərhəd əməliyyatlar (ölkə xaricində) aparılmayacaq. Bu həm xarici onlayn mağazalarda alış-verişin ödənişinə, həm də bu kartlardan xaricdə istifadəyə aiddir.

Fevralın 24-də Rusiya prezidenti Vladimir Putin qondarma Donbass respublikalarının rəhbərlərinin yardım xahişi ilə müraciətinə cavab olaraq "xüsusi hərbi əməliyyat" elan edib. Bundan sonra ABŞ, Avropa İttifaqı, Böyük Britaniya, eləcə də bir sıra digər dövlətlər Rusiyanın fiziki və hüquqi şəxslərinə qarşı sanksiyalar tətbiq edib.